(DW) – Diaranson ultimo Fiscalia di Peru a informa cu a amplia e investigacion preliminar di e presidente Dina Boluarte pa caso di e holoshinan di luho Rolex cu el a yega di exhibi den varios acto, ora ta inclui e posibel comision di delito di cohecho pasivo, cu ta suma enrikecimento ilicito.

A traves di Area di Enrikecimento Ilicito y Denuncianan Constitucional, Ministerio Publico a anuncia cu a expande e investigacion preliminar habri na e mandatario pa supuesto comision di delitonan di enrikecimento ilicito y omision di entrega declaracionnan di documentonan.

A detaya cu a dispone di amplia e investigacion pa compronde Boluarte pa e hechonan referi na e presunto comision di delito di cohecho pasivo.

Tambe a anuncia cu a amplia investigacionnan preliminar pa inclui gobernador regional di Ayacucho, Wilfredo Oscorima, ken a admiti cu a fia e holoshinan di luho na e mandatario, pa presunto comision di delitonan di cohecho activo generico.

Despues di entrada hudicial na su cas dia 30 di maart ultimo y na palacio di Gobierno, como parti di e investigacion, e hefe di estado a declara dia 5 di april durante mas di cinco ora na Fiscalia y despues a duna un pronunciamento na prensa den cual a nenga di tene holoshinan di marca Rolex y otro joyanan balora den miles di dollar.

“Boluarte tambe a sigura cu “tur loke nan a bisa ta falso” riba e posesion di joyanan balora den miles di dollar prome di mustra un armband, un coyar y renchinan di horea cu, segun el a bisa, “ta di bisuteria fino y di plata.”

E caso aki a ser habri dia 18 di maart ultimo despues di un rapport di e programa local “La Encerrona,” den cual a publica imagennan na unda Boluarte tabata luci holoshinan di luho na eventonan publico.

Fiscalia a confirma cu a cuminsa nan diligencia preliminar contra e presidente pa presunto delito di “uso di holoshinan di marca Rolex.” Di otro banda, Contraloria a bisa cu a cuminsa un proceso di recopilacion y evaluacion di declaracion di entrada, bienes y debenan di e presidente.

E prome reaccion di Boluarte pa e investigacionnan, segun el a bisa na prensa loke e tabatin tabata producto di su trabou y cu e holoshi tabata un articulo “antiguo” cu e ta usa eventualmente. Sinembargo, despues el a bisa cu “mi mester reconoce cu tabata un eror pa acepta den calidad di prestamo e holoshinan aki di mi amigo Wilfredo Oscorima,” el a agrega prome cu a indica cu a luci nan “den animo di representa bon e pais,” y duna nan back na su propietario.

Cinco dia despues, Fiscalia a confisca tres holoshinan Rolex y un armband cu ta propiedad di Oscorima, ken ta un empresario dedica na casinonan y pustamento, a fungi como gobernador di Ayacucho pa tres biaha y tin varios investigacion habri pa Ministerio Publico pa delitonan di corupcion.