E caso di un muhe cu a agredi un trahado di obra pa su rasgonan na e region di Arequipa, na sur di Peru, a pone di manifiesto un cifra: 53% di e Peruanonan ta considera cu e ciudadanonan ta racista.
Na e region di Arequipa, un muhe tabata stuur na un caminda unda tabata haci obranan publico. Sinembargo, e circulacion na e zona tabata pega. Esey tabata e splicacion cu un muhe trahado a intenta di duna un señora ora di controla e trafico den e parti ey, pa e siguridad di peaton y chauffeurnan.
Sinembargo, e muhe cu tabata stuur no a kier scucha e trahado, y a avansa cu su auto y el a pasa riba e pianan di e muhe trahado. E reaccion di e trahado, pa su dolor, tabata di golpia e auto di e muhe cu un palo. Ora e muhe a ripara, el a sali rabia di su auto y a grita y a agredi e muhe trahado cu un palo.
“Loke nos a wak ta un punta so di e iceberg di loke ta pasa na e pais”, Karina Pacheco, escritor y antropologo cu ta investiga racismo, discriminacion y diversidad cultural na Cusco, a denuncia. “Esaki ta un racismo violento, agresivo, asina nos a wak historicamente y con el a keda na Peru na origen, cu miedo”.
Na 2018, e Ministerio di Cultura a encarga IPSOS pa realisa e prome encuesta riba diversidad cultural y discriminacion. Den un muestra di 3,781 persona, 53% di e persona di e encuesta a considera cu e Peruanonan ta racista of hopi racista. Sinembargo, e 8% so a reconoce nan mes como racista.
Ademas, e 21% a indica cu su comunidad ta racista of hopi racista, mientras cu 17% a reconoce cu nan amigonan of famia ta racista.
