Peru: Presidente Boluarte ta pidi “pacto” cu sectornan di oposicion

(DW) – Diadomingo ultimo, presidente di Peru, Dina Boluarte a yama oposicion politico pa establece “un pacto di gobernabilidad” di su pais pa permiti –segun el a bisa– cumpli cu e “responsabilidad historico” di atende e necesidadnan di 33 miyon Peruano.

“Aleha for di e voznan cu ta dividi, cu ta spera pa nos rindi, pa nos hala atras di e caminda aki di e lucha, pa progreso di e patria, mi ta yama na un pacto pa Peru, un pacto di gobernabilidad, pa democracia,” Boluarte a señala durante un ceremonia realisa na Palacio di Gobierno di Lima.

E presidente a agrega cu “den un pais dividi”, intolerante, un grupo minoritario cu ta move e aspectonan menciona, “ta afecta unidad” y tambe a enfatisa cu “e pais ta exigi unidad di su autoridadnan pa bay dilanti.”

Boluarte a plantia esaki dos dia despues cu Parlamento a rechasa di admiti tres mocion di desconfiansa presenta contra dje pa congresistanan di oposicion, agrupacion politico di iskierda den nan mayoria.

E hefe di Estado a resalta, ademas cu “tur politico tin un responsabilidad historico cu mas di 33 miyon Peruano. P’esey trabou den unidad, manera semper mi ta bisa, den un solo curason patriota, ta bay haci cu nos patria lo bira mas grandi, y cu den dje e Peruanonan lo tin mas derechonan.”

Ademas, tambe a bira conoci cu diabierna di siman pasa un tribunal di apelacion a ordena e liberacion di e ruman y abogado di Boluarte, despues di anula e detencion preliminar cu tabata cumpli pa presunto vinculo cu un trama di corupcion.

“Ta revoca e resolucion cu ta dicta detencion preliminar sin comunicacion contra Nicanor Boluarte y Mateo Castañeda pa e plaso di 10 dia cu motibo di diligencia di presunto delitonan di organisacion criminal. Ta dispone di nan libertad inmediato,” e hues Sonia Torre a bisa na final di un audiencia.

Ambos a ser deteni pa un ekipo policial y fiscal e dia 10 di mei ultimo pa nan presunto vinculacion den caso di nombramento di funcionarionan a cambio di soborno, segun Fiscalia a señala.

Fiscalia a pidi amplia pa 15 dia mas e detencion, mientras tabata busca mas pruebanan contra esun investiga, pero hues a nenga e solicitud ey.

Tur di nan “ta ser investiga pa delitonan di organisacion criminal y trafico di influencia.”

Nicanor Boluarte di 64 aña di edad, ta e ruman mayor di e mandatario Peruano, na ken Fiscalia a señala di dirigi un red di corupcion nombrando personanan a cambio di “beneficionan economico,” probechando e “poder de facto” cu a ricibi for di e presidente, segun e poder hudicial a bisa.