Presidente di Peru, Martín Vizcarra, a laga di un banda e inmunidad cu su cargo tin y a pone su mes na disposicion di Fiscalia pa un denuncia di presunto corupcion durante su gestion como gobernador di e region di Moquegua (2011-2014).
Medionan local a publica un carta cu Vizcarra a remiti dia 24 di mei pasa na fiscal Walker Rios Calisaya, di e Despacho Specialisa di Anti corupcion, caminda ta comunica cu e ta pone su mes na disposicion pa coopera cu e investigacionnan.
E fiscal ta investiga un denuncia riba presunto pagonan ilegal dor di e consorcio supervisor di e construccion di e dam Chirimayuni, cu a rekeri di un inversion di 31,6 miyones di sol (9,5 miyon dollar). Vizcarra ta ser acusa di comete delito di negociacion no compatibel, pa presuntamente permiti e pago di e balorisacion, aunke e trabou no a ser cumpli.
Aunke e investigacion a keda finalisa, e fiscal a informa cu no lo por formalisa un acusacion dilanti di un hues pa motibo cu Vizcarra ta protegi pa inmunidad presidencial. Diabierna pasa Vizcarra a rechasa cu e tabatin denuncia di e cual e ta protegi pa su inmunidad presidencial, manera un politico opositor a sigura.
E gobernante a anuncia e siman aki cu e presentacion ta un asunto di confianza pa su proposicion di reforma politico, cu den e caso di rechasa, lo por hiba na e disolucion di Congreso.
