Un grupo di ocho tecnico di un compania di telecomunicacion a wordo libera diasabra ultimo, despues di pasa casi 48 ora secuestra pa campesino na Andes Peruano, kendenan tabata teme cu e tecnico lo instala un antena di 5G, e mesun cu a wordo kima pasobra nan a kere cu esey lo por transmiti Covid-19.
E trahadonan di empresa Gilat a wordo libera despues cu e habitantenan di comunidad campesino Chopcca, na region Andino di Huancavelica, a yega na un acuerdo cu e compania, segun Gobierno Regional di departamento di centro di Peru.
E pacto a consisti cu e empresa lo splica na un asamblea publico kico ta e antenanan y rednan di 5G, lo disculpa pa un comentarionan cu a haci y cu e campesinonan ta considera racista y no lo tuma accionnan legal contra nan.
Den palabracionnan cu a tuma luga na plasa di e poblacion di Chuñunapampa hasta a participa e gobernador regional di Huancavelica, Maciste Diaz y representantenan di Ministerio di Transporte y Comunicacion (MTC) a interveni.
E tecnico di e empresa tabata secuestra desde diahuebs, ora nan a acudi na e punta di sero di e zona pa duna mantencion na un antena di telefon di tecnologia 4G.
E habitantenan di Chopcca a detene e tecniconan y a destrui e antena despues cu via rednan social a duna di conoce cu tabata instala un antena 5G, e mesun cu nan a kima oranan despues.
Na comienso, e presidente di comunidad di Chopcca, Lorenzo Escobar, a exigi e retiro di e antenanan pa laga e tecniconan den libertad, pero comunidad a flexibilisa nan reclamonan na medida cu e mesun miembronan a keda convenci cu no lo instala 5G ni tampoco lo transmiti coronavirus.
Ministerio di Transporte y Comunicacion a aclaria den un comunicado cu ‘na e pais no ta existi antena 5G’ y a nenga cu e structuranan aki tin relacion cu Covid-19, pa loke a enfatisa e importancia di laga atras e mito pa loke ta trata instrumentonan di conectividad.
