Peru: Nicolas Maduro no ta bonbini na Cumbre de las Americas

(Infobae/) – Gobierno di Peru a bisa cu presidente Maduro ‘no lo ta bonbini’ na e proximo ‘Cumbre de las Americas’ programa pa dia 13 y 14 di april venidero na Lima, Peru. E declaracion di e canciyer Cayetana Aljovín, cu a haya respaldo di e paisnan presente na e reunion di e Grupo di Lima, agrupacion di 12 pais di continente Americano encuanto e situacion na Venezuela, ta implica cu e dictador Venezolano no lo por asisti na e reunion. Recientemente autoridadnan Venezolano a anuncia nan presencia. Esaki riba un invitacion di aña pasa, cu segun e pais anfitrion ya no tin validez.

E ministro di Asunto Exterior di Peru a vocifera su opinion na salida di e reunion cu e Grupo di Lima, celebra na Lima, den cual e canciyer y representantenan di diesdos pais Americano a debati tocante medida cu mester tuma, despues di e convocatorio di eleccion adelanta na Venezuela, anuncia pa dia 22 di april proximo. Den su declaracion sr. Aljovín a referi tambe na e Declaracion di Quebec di 2001, un declaracion conhunto na e di tres Cumbre, unda ta formula e base di e colaboracion entre e estadonan. Den e declaracion aki ta formula cu e ruptura di democracia ta constitui un obstaculo insuperabel pa participacion di un estado na e Cumbre de las Americas. Basa riba esaki, ta considera cu sr. Maduro no ta bonbini na e proximo Cumbre. Ministro di Relacionnan Exterior di Venezuela, Jorge Arreaza, a anuncia dia 6 di februari cu sr. Maduro ‘lo asisti puntualmente (na e Cumbre) pa defende soberania di America Latino y di Caribe, y pa reuni cu e combativo pueblo di Peru’. E VIII Cumbre de las Americas tin como tema central corupcion, mientras cu e tension creciente respecto e situacion na Venezuela, y e rechaso cu e figura di sr. Maduro ta genera den gran parti di e paisnan di e region, a haci cu e bishita di e presidente na Lima, a bira un di e aspectonan mas destaca di e encuentro. Na Peru politiconan di tur sector a apoya un mocion den parlamento pa pidi gobierno pa no permiti entrada di e presidente Venezolano y declara esaki ‘persona non grata.’