(BBC) – Despues di un reconteo di votonan angustiante di e di dos buelta electoral cu a ser celebra dia 6 di juni ultimo y simannan despues di impugnacion y di bataya legal, Hurado Nacional di Eleccionnan dialuna ultimo a declara ganado e candidato iskierdista di Peru Libre, Pedro Castillo.
Castillo a logra impone su mes na e derechista Keiko Fujimori, di Fuerza Popular, cu tabata aspira pa di tres biaha e presidencia di e pais y cu su reclamonan a retrasa e nombramento di un vencedor.
E anuncio a yega poco dianan prome cu su tuma di posesion y cu e presidente nobo pa Peru di e periodo 2021-2026 lo asumi su funcion dia 28 di juli.
E conteo ahusta a yega na 100% diamars 15 di juni, haci mas di un luna, pero autoridadnan electoral Peruano no por a proclama e ganado.
Tabata falta pa resolve e pedidonan di anulacion di actanan di votacion cu a ser presenta pa e partido di Fujimori, Fuerza Popular.
Prome di haci oficial e proclamacion di Castillo dialuna ultimo, Fujimori a declara: “Mi ta bay reconoce e resultadonan, pasobra esey ta loke e ley y Constitucion ta manda y cu mi a hura di defende”.
Despues di participa den e proclamacion di resultadonan, cu a ser realisa den un ceremonia virtual, e presidente eligi a presenta na centenares di siguidonan y a yama pa “amplia unidad den e pueblo Peruano” pa cu su gestion lo permiti cu su pais lo ta “mas husto, mas soberano, mas digno y mas humano”.
“E espacio aki ta pa haci un gobierno di tur Peruano, di tur sanger, sin discriminacion algun. Esaki lo ta e gobierno na unda ni un hende lo keda atras, mi ta haci e convocatorio, e espacio aki ta habri, pero cu lealtad, cu transparencia”, el a sigura.
