(NTN24) – E crisis na Peru ta birando pio cada dia desde cu a retira ex-presidente Pedro Castillo for di su funcion y despues a nombra Dina Boluarte como hefe di Estado interino.
Ayera dialuna, centenares di manifestante cu palo, taira y piedranan a subi e pista di aterisahe di aeropuerto internacional Alfredo Rodriguez Ballon na ciudad di Arequipa, e di dos mas pobla na Peru.
Segun e prome rapportnan, na e aeropuerto importante aki e manifestantenan a yega pa pidi e renuncia di Boluarte, oranan despues cu e mandatario a anuncia su intencion di adelanta eleccion general, den cual lo eligi un presidente pa april di 2024.
Riba video cu a bay viral riba medionan local y rednan social por mira un grupo di persona canando cu banderanan di Peru riba e pista di aterisahe. Ademas, por mira shinishi y piedranan riba tereno di aeropuerto.
A blokea e pista cu piedra, palo y tairanan. Tambe a destrui luznan di e pista pa loke e luga mester a cera.
Te ayera, no tabata conoci e rapport di herido of personanan afecta. Sinembargo, algun medio local ta papia di un homber di 70 aña cu a resulta herida cu perdigon, mientras cu otro persona a haya un herida na su cara.
E anuncio di presidente Dina Boluarte di presenta na Congreso un proyecto di ley pa adelanta eleccion di april 2026 pa april 2024 ta parce cu no a calma e manifestantenan, cu for di e detencion di Castillo a sali riba caya pa exigi su liberacion y e renuncia di e mandatario nobo.
Castillo ainda te deteni pa orden di un hues, debi cu el a purba disolve Congreso dia 7 di december ultimo, loke hopi hende a bisa tabata un auto-golpi di Estado fracasa.
