(EFE) – Presidente di Peru, Dina Boluarte, a anuncia diaranson ultimo cu e ta bay declara un emergencia den e regionnan di Amazonas, San MartIn y Ucayali pa facilita e trabounan di disminucion di e candelanan di mondi cu a ser causa den e departamentonan di selva ey di e pais.

Den un ceremonia oficial, Boluarte a bisa cu Conseho di Minister a bay di acuerdo ayera pa declara estado di emergencia den e tres region, den un di nan, Amazonas, ta “dificil” pa avionnan drenta pa paga e candela for di laira a traves di e condicionnan atmosferico complica.

“Conta cu nos, boso no ta boso so, pero ban no causa mas candela,” asina e mandatario a bisa.

Boluarte a señala cu mas di 80% di e candela forestal den e pais ya a ser controla y paga, pero cu tin algun region unda e emergencianan aki ta persisti, a pesar di e esfuersonan di e rescatistanan y e forsanan arma cu ta apoya nan extincion.

Den e sentido ey, e gobernador a sigura e poblacion cu nan lo atende e candelanan, como tambe e problema di scarsedad di awa na Iquitos, capital di e Amazonas Loreto.

Boluarte a bisa cu nan a manda caba 20 ton di yudansa humanitario pa Iquitos pa atende e scarsedad di awa aki pa motibo di e falta di awasero den e region mas grandi di Amazonia di e pais.

Segun e ultimo rapport di e Centro Nacional di Operacion di Emergencia (COEN), den e region di Ucayali tabatin 4 sector di e districto di Nueva Requena, den e provincia di Coronel Portillo, caminda un candela forestal cu a cuminsa ocho dia pasa y ainda ta sigui activo.

E candela a expande den direccion di e municipio di Belen de Juda, caminda e municipio y habitantenan ta trahando pa controla y paga e candela, COEN a declara den su cuenta riba e red social X.

Na mes momento, na Amazonas, unda e candelanan a destrui instalacionnan di punto di bista turistico, un avion di Forsa Aereo a realisa trabounan pa paga un candela forestal den e districto di Florida, provincia di Bongara, pero e ta keda activo y ta destrui hectarnan di cobertura natural.

Den un otro sector di Bongara, brigadanan forma pa personal y residentenan municipal a paga e candela den e districto di Jumbilla, cu a cuminsa nuebe dia pasa.

Di acuerdo cu e rapport di e Instituto Nacional di Defensa Civil entrega diamars ultimo, Peru tabatin 34 candela di mondi activo y 21 controla, for di un total di 234 candela registra te awor e aña aki, mientras cu e victimanan a subi na 16 morto y 140 herida.

E titular di Defensa Civil, Juan Carlos Urdariegui, a bisa cu tin cuater avion ta warda pa e condicionnan di vuelo mehora den e regionnan noord di Amazonas y Cajamarca, dos di esnan mas afecta pa e candela di mondi, pa nan por actua cu e bashamento di awa.