(Infobae) – Peru lo promove e realisacion di un prome concierto piloto na Lima, den aire liber, cu un cantidad di publico limita y protocolnan di bio-siguridad cu e fin di duna impulso na e reactivacion di industria musical cu a wordo afecta pa emergencia sanitario di coronavirus.
A traves di un comunicado, Ministerio di Cultura diasabra ultimo a informa cu nan ta trahando pa identifica un espacio adecua na e capital di e pais pa desaroya e prome espectaculo musical cu publico desde e yegada di Covid-19 na maart di 2020.
E cita cultural aki cu ta pendiente di un fecha, lo conta cu e participacion di varios artista nacional di diferente genero musical.
E cartera a sigura cu e prueba piloto lo celebra den aire liber y lo cumpli cu e publico permiti di acuerdo cu e nivel di alerta pa e pandemia.
Den e marco aki, e titular di Cultura, Alejandro Neyra, siman pasa a reuni cu un grupo di artistanan, productornan y tecnico cu tin relacion cu e industria musical nacional y a plantia e desaroyo di e actividad aki, cu lo pretende di haci na otro ciudadnan di e pais.
E ministerio a precisa cu e obhetivo, ta pa “reactiva industria di musica, y na mesun momento preserva cultura y entretenimento, di forma sigur”.
Diabierna di siman pasa Peru a amplia su campaña di vacunacion contra Covid-19 pa personanan vulnerabel, incluyendo pacientnan psikiatrico, y e grupo di entre 65 y 69 aña, na e momento cu Latino America ta acerca na e miyon di morto pa via di e pandemia.
Na maart, Spana a haci un prueba piloto similar, ora a organisa un recital pa cinco mil persona na Palau Sant Jordi di Barcelona den cual e grupo Love of Lesbian a toca. Den e oportunidad aki e balor di un entrada tabata inclui e realisacion di un prueba rapido y un tapaboca di calidad halto, cu su uso tabata obligatorio.
