(DW) – Ex-presidente Pedro Castillo diahuebs ultimo a reitera dilanti un tribunal su solicitud pa anula e proceso cu e tin pa intento di auto golpi di Estado failliet y su liberacion di prison unda e ta cera for di 7 di december 2022.
Castillo a participa den un audiencia virtual pa e causa di delito di rebelion, na unda a pidi anula e acusacion cu ta solicitando pa impone na su persona di 34 aña di prison pa e auto golpi di Estado failliet y tambe pa resolve of anula e solicitud di sobreseimiento.
E ex-gobernante (2021-2022) a bisa cu despues cu el a pronuncia su mensahe dia 7 di december 2022 e no a ser deteni den fragancia ni a purba di huy, el a bisa cu el a ser aresta arbitrariamente “cu fusil den man.” Tambe a sostene cu e acusacion di Fiscalia den su contra ta “un cortina di huma.”
12 di januari ultimo, Ministerio Publico a solicita pa sanciona Castillo pa delitonan di rebelion, abuso di autoridad y perturbacion grave na trankilidad publico.
Di otro banda, Poder Hudicial tambe a anuncia diahuebs ultimo cu e hues Juan Carlos Checkley a acepta un recurso di apelacion introduci pa Castillo pa asina por revisa e orden di prision preventivo pa 36 luna, cu a ser implementa mientras e tabata ser investiga pa delito di organisacion criminal.
Checkley a resolve pa manda e recurso di apelacion na Sala Penal Permanente di Corte Supremo di Husticia “pa e fin pertinente”, cu lo cual e tribunal maximo mester dicidi tocante e solicitud ey.
Ex-mandatario ta cumpli orden di prision preventivo pa 18 y 36 luna den prison di Barbadillo, na Lima, na unda tambe ta deteni e ex-presidente Alejandro Toledo (2001-2006) ken ta procesa pa un caso di corupcion vincula cu e compania Brasilero Odebrecht.
