Ex vice ministro di comunicacion, Jorge Cuba a uza un di tres empresa offshore (empresa den pais cu bao tasa fiscal), pa sconde tur soborno cu nan a haya di banda di empresa di Brasil  Odebrecht, pa asina logra e  adhudicacion di metro di Lima. E compania Julson Internacional S.A. a wordo constitui na Panama dia 3 di augustus di 2011. Nan a crea e compania ey, cu obhetivo di desvia placa cu empresa Odebrecht a deposita den diferente offshore manera Hispamar Internacional Corp y Oblong Internacional INC pa US$ 2.5 miyon.

Esun cu ta beneficiario di empresa di papel aki ta  hungado di volleyball y su casa, Jessica Tejada cu un 56%, hunto cu ex funcionario di MTC Miguel Angel Navarro Portugal cu un 44 %.  Ambos tabata beneficiario tambe di Hispamar. Diabierna e hues prome di corte di investigacion preparatorio nacional di Peru, Richard Concepcion Carhuancho a duna castigo di 18 luna di prizon preventivo contra Navarro Portugal, ken ta acusa di delito di labamento di placa.

Magistrado aki ta sigura cu ta existi hopi elemento cu tin Navarro envolvi como posibel ‘testaferro’ (persona cu fia su nomber pa figura como representante di un negoshi of un asunto huridico) di Jorge Cuba, kende a huy di husticia y cu ta integrante di un organisacion criminal.

E fiscal adhunto Marcial Paucar a presenta documento cu autoridad a haya durante un  entrada hudicial na cas di Miguel Navarro.

Evidencia

Durante e audiencia  Fiscal Paucar di ministerio publico, a informa di un USB cu ta pertenece na Navarro, unda nan a haya documento cu ex funcionario di Peru a manda pa banco priva na Andorra. Nan a haya tambe un solicitud di prestacion di servicio y un declaracion hurada di beneficio real. E documento  tin firma di Navarro y el a reconoci cu documento ey  ta di su mes.

Navarro a acepta cu e constitucion di offshora a wordo crea pa solicitud di ex vice ministro Jorge Cuba.

Durante e audiencia Navarro a acepta tur acusacion su contra y a pidi disculpa na Peru. Te na e momentonan aki Navarro mester warda pa su proceso di investigacion den prizon. Ayera a ser traslada na prizon.