E decision aki tabata pa via cu por lo menos 13 di 18 minister di gabinete di Manuel Merino a renuncia y awor Congreso lo mester nombra un presidente nobo pa pacifica e pais, esun eligi lo ta e di tres mandatario den menos di un siman.
Ayera Peru tabata hundi den su pio crisis politico den 20 aña den mey di presion cu tabata exigi e renuncia di e presidente despues di protestanan cu a laga dos morto y casi 100 persona herido.
Den un discurso dirigi pa nacion, Merino a bisa cu el a presenta su renuncia ‘irevocabel’ pa invoca paz y unidad di tur Peruano, despues cu el a wordo nombra presidente di Republica cuatro dia pasa.
Tambe a señala cu pa lo no tin un “vacio di poder” e 18 minister cu el a huramenta lo mester sigui den su funcion temporalmente, aunke casi tur di nan a renuncia despues di e represion pa manifestantenan diasabra ultimo.
Siguridad social a confirma dos morto cu proyectil di arma di candela. Jack Pintado, di 22 aña, a ricibi 11 impacto di bala den su cabes y otro parti di su curpa mientras cu Jordan Sotelo, di 24 aña, a haya cuatro herida cerca di su curason.
E dos morto a tuma luga pa via di uso excesivo di forsa di parti di polis, un practica cu a wordo denuncia caba diabierna ultimo pa Human Rights Watch y Amnistia Internacional.
Ministerio di Salud a agrega cu 94 persona a keda herida, entre nan 63 a wordo hospitalisa, varios cu golpinan fuerte, pa via di gas lagrimogeno y herida di arma di candela.
Asociacion Nacional di Periodista diasabra ultimo a indica cu entre dialuna di siman pasa y diahuebs ultimo durante e manifestacionnan tabatin 35 atake pa reportero y a agrega cu “agentenan di polis a haci’e 29 di nan y 6 persona no identifica den e marco di manifestacionnan ciudadano”.
