Turistanan a reporta e ciere di accesonan pa drenta na ruina di Machu Picchu desde diabierna ultimo, despues cu habitantenan di e area aki na sur di Peru a cuminsa un welga indefini pa pidi pa companianan di train cu ta opera na ruta pa aumenta e frecuencia di nan servicio pa bishitantenan nacional.
E protesta cu a cuminsa siman pasa y a bira pio ora nan a tuma e stacion di treinnan, nan a blokia e via diabierna ultimo, despues cu companianan operador PeruRail y Incarail no a acepta e demanda di habilita tres y dos frecuencia exclusivo, pa turistanan nacional.
“E empresanan aki ta garantisa 100 stoel solamente na un costo di 12 sol pa dia pa e Peruano. Nos ta pidiendo pa tin tres frecuencia di por lo menos 300 stoel pa dia, kiermen, 900 stoel”, vocero di comunidad di bisiña di Machu Picchu a sigura.
Habitantenan di e luga ta exigi pa lo aplica e medida como parti di e reactivacion di e localidad aki di e region sur di Cusco, despues di e fuerte impacto economico causa pa Covid-19. Sinembargo, representantenan di operadonan a afirma cu e demanda no ta factibel.
Otro grupo afecta pa via di e situacion ta e turistanan, ken a afirma cu ora a yega na e zona nan no a logra di drenta pa cumpli cu nan itinerario, e comite di lucha di districto di Machu Picchu a declara cu tambe a suspende e entrada via terestre desde e localidad di Santa Teresa, pa loke a pidi pa bishitantenan y companianan di turismo pa no purba di yega “pa un tema di siguridad”.
Desde diahuebs ultimo, PeruRail a dicidi di suspende e operacion di su treinnan di ruta pa Machu Picchu den cumplimento cu loke empresa Ferrocarril Transandino S.A a dispone, consecionario di e via ferreo. PeruRail a sigura cu a tuma e decision ey pa preserva e siguridad di nan pasahero y trahadonan y cu lo reestablece nan operacion ora lo ricibi un notificacion di e consecionario.
