For di diahuebs pasa Peru ta na caminda pa un choke di poder entre presidente Martin Vizcarra y Congreso opositor, despues cu un comision parlamentario a rechasa su proposicion di adelanta eleccionnan pa enfrenta e crisis institucional cu e pais ta biba.
“A aproba pa mayoria e predictamen cu ta archiva e proyecto di ley di Poder Ehecutivo cu ta plantia e adelanto di eleccionnan na 2020”, e presidente di Comision di Constitucion, Rosa Bartra, a bisa ora e anuncia e resultado di e votacion.
E proyecto, cu Vizcarra a presenta dos luna pasa, tabata propone e adelanto di un aña di eleccionnan general (presidencial y parlamentario) como e salida di e ‘crisis institucional’ cu ta afecta Peru desde 2016.
E decision parlamentario ta habri e portanan pa Vizcarra insisti riba su proyecto electoral hunto cu un mocion di confiansa, cu si ta rechasa, lo permiti pa e Ehecutivo cera constitucionalmente e Congreso y convoca eleccionnan di biaha.
Varios congresista, liberal y di iskierda, a bandona e sesion di votacion den protesta pa e actuacion di mayoria derechista di e comision, cual cu su rechaso di e proposicion a evita cu e Congreso pleno pronuncia.
E partido fujimorista cu ta controla e Congreso, Fuerza Popular, a hustifica e decision di warda e proyecto pa motibo cu Congreso a ser eligi pa cinco aña, te 2021.
Peru ta hundi den un enfrentamento entre Ehecutivo y Legislativo desde cu Pedro Pablo Kuczynksi a vence e populista Keiko Fujimori, na juni di 2016.
Kuczynksi a renuncia na maart di 2018, menasa pa Fuerza Popular y e scandal di corupcion di Odebrecht
