Ayera a tuma luga na Lima, Peru, e prome reunion di tur e paisnan cu ta reconoce presidente encarga di Venezuela Juan Guaido, cu un yamada di Peru pa intensifica esfuerso pa logra cu Nicolas Maduro ta sali di poder. “Mi ta invita boso pa renoba nos pleno respaldo na presidente Juan Guaido,” e canciyer Peruano, Nestor Popolizio, a declara na apertura di e reunion di 55 pais.
Entre e participantenan tin Estadonan Uni, cu a congela dialuna tur activo di gobierno Venezolano den su teritorio, un medida cu no a aplica mas den ultimo tres decada na un nacion Americano.
Despues di e prome reunion aki convoca pa e Grupo di Lima, unda asesor di siguridad di gobierno di Trump, John Bolton, a hiba palabra, tabatin e conferencia mes, cu un reunion mas amplio di como 60 pais, incluyendo algun cu ainda ta reconoce Maduro, manera Mexico y Uruguay.
E gran ausentenan na e “Conferencia Internacional pa Democracia na Venezuela” ta e principal aliadonan di Maduro, manera Cuba, Rusia, China y Turkia, cu a nenga e invitacion.
Den e conferencia a participa varios canciyer, entre nan di Colombia y Brasil, ademas di delegado di 60 pais, incluyendo Vaticano, y tres organismo internacional, entre nan Union Europeo y Banco Interamericano di Desaroyo.
No tabatin intencion di yega na un declaracion conhunto, mirando e opinionnan diferente tocante ken ta e gobierno legitimo. Loke tabata reuni tur delegacion ta e deseo di un solucion pacifico pa retorno di Venezuela na democracia.
