(Infobae) – Epidemia di Virus di Inmunodeficiencia (HIV) a aumenta na Loreto, cu a bira e di dos departamento cu mas caso despues di Lima. Den e region aki di Amazonia cu ta cubri 60% di e teritorio nacional, ta falta programanan di prevencion y tratamento adecua pa atende e problema.
Loreto a bira e di dos region cu mas caso di HIV na Peru, segun e ultimo datonan oficial di Ministerio di Salud (Minsa), divulga pa e dokter infectologo Juan Celis ken a bisa cu “E epidemia ta avansando den e region sin ningun tipo di iniciativa di salud publico pa enfrenta e reto aki,” e specialista ta enfatisa.
Pa loke ta trata porcentahe di casonan di HIV registra na 2024, Lima ta lider cu 46%, sigui pa Loreto cu 9%, Callao cu 7%, Lambayeque, La Libertad y Arequipa cu 6% cada un. E aumento aki na Loreto ta significante, ya cu e region a pasa di di tres pa di dos luga den e ranking nacional.
Ademas, na e ora di analisa e cantidad di casonan pa cada 100 mil habitante, Amazonas ta ocupa prome luga, sigui pa Ucayali y Loreto. E indicador aki ta resalta e seriedad di e situacion den e regionnan aki, unda e incidencia di HIV ta particularmente halto.
Acceso na tratamento antiretroviral den Amazonia Peruano ta limita y hopi mester biaha distansianan largo pa ricibi cuido medico. Ademas, un falta di educacion y conscientisacion tocante HIV ta contribui na e continuacion di stigma y discriminacion.
E falta di iniciativanan di salubridad publico na Loreto ta preocupante, ya cu e region ta enfrenta un aumento significante di casonan di HIV. E ausencia di programanan adecua di prevencion y tratamento por bira pio e situacion mas ainda, poniendo e salud di e poblacion na peliger.
E situacion na Loreto ta refleha un problema mas amplio den e pais, unda cu varios region ta mirando un aumento di casonan di HIV sin un respuesta efectivo di parti di autoridadnan di salud.
Den e region inmenso di Amazonia di Peru, hendenan muhe cu ta biba cu HIV ta enfrenta retonan significante debi na falta di acceso na tratamento adecua y discriminacion social. Un rapport di Volcanicas na 2022, a splica con e situacion di hende muhe aki ta critico den e departamentonan di Loreto, Madre de Dios y Ucayali.
Den añanan 1990, machismo y stigma pa cu hende muhe cu HIV tabata comun. E discriminacion aki, hunto cu e situacion economico y social den e region, tabatin un impacto negativo riba e salud di hopi hende muhe. Falta di informacion y datonan riba e situacion di hende muhe cu HIV den Amazonia Peruano ta pone problema mas pio ainda.
