Despues di e polemica cu a lanta na Chile, unda Papa Francisco a acusa e victimanan di un sacerdote pedofil di a calumnia un obispo, na Peru e continuacion di su biahe a bay den un ambiente mas positivo. E gira a termina cu un ceremonia na Lima, cu presencia di cien mil di creyente.

A pesar di esey, no tabata falta un nota critico den forma di un pancarta, cu a resalta e caso di Luis Figari, lider religioso Peruano cu ta biba na Roma bao amparo di Vaticano, a pesar di multiple denuncia contra su persona. E pancarta cu e mensahe “Francisco aquí sí hay pruebas” cu e cara di e Peruano Luis Fernando Figari, fundado di un movemento conservador catolico y acusa di a comete abuso sexual, a ser colga na un edificio dilanti un famoso monasterio na Lima unda Papa Francisco a acudi diadomingo.

Poco dia prome cu su gira pa Sur America, Vaticano a tuma na su encargo e controversial movemento catolico Sodalitium Christianae Vitae y a designa un comisionado pa asumi responsabilidad di e grupo, cu tin alrededor di 20.000 miembro den henter Sur America y Merca.

Aunke no a acusa Figari nunca, hopi di e denuncianan contra su persona, a wordo confirma pa un investigacion di Iglesia. A ordena Figari pone un fin na tur contacto cu e miembronan di e sociedad y desde e tempo ey e ta biba na Roma, bao amparo di Vaticano.

E mensahe colga na e edificio ta referi na loke a sucede na Chile, unda Francisco a acusa e victimanan di e sacerdote pedofil mas grandi di e pais, di a calumnia un otro obispo, Juan Barros. E victimanan a afirma cu Barros tabata sa di e abuso cometi pa e sacerdote Fernando Karadima pero nunca a par’e o a denuncia esey, lo cual Barros ta nenga.

“Dia nan trece un prueba pa mi contra obispo Barros, ey mi ta bay papia”, Francisco a bisa periodistanan Chileno na Iquique. “No tin ningun prueba en contra, tur cos ta calumnia, esey ta cla?” el a añadi causando bastante iritacion na Chile.

Fiscal di Peru a solicita prizon preventivo na december pa cuatro miembro di e sociedad Sodalicio, entre nan Figari, pa abuso sexual.

Ningun di e acusadonan ta sacerdote. Figari, cu ta alega di ta inocente, ta biba na un cas di anciano na Roma, ampara pa un decreto di Vaticano cu ta prohibie bolbe Peru. E sociedad Sodalicio a admiti cu cuatro di su lidernan entre nan su fundado, a abusa sexualmente di 19 menor y 10 persona mayor. Segun e denuncianan, e abusonan a tuma luga entre 1975 y 2002.