Instituto Nacional Penitenciario di Peru (INPE) a informa e Poder Hudicial cu e ex-presidente Peruano, Alberto Fujimori, lo por wordo cera den e prizon di Barbadillo.
Presidente di INPE, a afirma cu e prizon di Barbadillo, unda Fujimori tabata interna entre 2007 y 2017, tin e condicion pa e ex-presidente, di 80 aña di edad, por conclui su condena di 25 aña di prizon pa delitonan di lesa humanidad.
E ex-mandatario, cu tabata na poder entre aña 1990 y 2000, a ser evalua pa un hunta di e Instituto di Medicina Legal diaranson pasa na e clinica particular unda e ta interna desde 100 dia pasa.
Den su informe, e Hunta a indica cu ‘e pashent ta den condicion stabiel, pa cual motibo e lo por ricibi tratamento di forma ambulatorio”.
Minister di Husticia, Vicente Zeballos, a expresa cu awo ta coresponde wak e alta medico di Fujimori di parti di specialista cu ta atende e ex-presidente na e clinica Centenario, pa duna cumplimento pa e decision di e Sala Penal Special di e Corte Supremo.
Un siman pasa, e Corte Supremo a ordena e evaluacion di e salud di Fujimori pa determina ora e lo por sigui cu e cumplimento di su condena como autor mediato, di dos masacre cu a ser cometi pa e grupo militar di Colina y e secuestro di un periodista y un empresario.
