Gobierno di Peru a invita cien pais, di e cual Cuba, China, Rusia y Turkia ta inclui, pa participa e proximo 6 di augustus den un cumbre internacional na Lima riba e crisis di Venezuela, diaranson pasa e canciyer Peruano Nestor Popolizio a informa.
“Lo ta un reunion basta amplio”, Popolizio a bisa den un combersacion cu prensa stranhero acredita na Lima, den cual a splica cu e intencion ta pa debati riba e ‘miho manera pa recupera e democracia na Venezuela’ y examina e impacto cu a genera e masivo migracion di Venezolanonan pa e paisnan bisiña.
E canciyer a detaya cu e invitacion pa e encuentro aki, cual Peru a acepta pa tene durante e reunion di e Grupo di Lima celebra na april pasa na Chile, ta haci na nivel di ministernan di Exterior y e Santo Sede ta inclui.
Nestor Popolizio a afirma cu e proposito ta pa reuni e paisnan cu den algun medida tin vinculo cu loke ta pasa na Venezuela, cu e speransa di incentiva e dialogo pa un eleccionnan nobo den e pais petrolero.
E canciyer Peruano a agrega cu ni e representante di gobierno di Nicolas Maduro ni oposicion ta invita pa e cita. “Nos no kier polarisa e encuentro”, e canciyer a bisa den un conferencia di prensa.
Na 2017, Peru a crea e Grupo di Lima, un bloc regional di paisnan di Latino America y Caribe, ademas di Canada, cu haci impulso pa e reforma democratico na Venezuela durante añanan, consecuentemente e emiti declaracionnan conhunto critico pa Nicolas Maduro.
Popolizio a bisa cu a haci invitacion diabierna pasa pa e cita na Lima na canciyernan di 100 pais, cu ta inclui Merca, y ta spera e contesta di tur di nan den e proximo dianan.
