(La Republica) – Fiscalia Anticorupcion diaranson ultimo a interveni e sede di Direccion di Cultura di Cusco (DDC) pa cuminsa investiga riba e presunto uso di mashinnan y personal den e benta di carchinan pa drenta na un di e maraviyanan mundial cu ta Machu Picchu.
E yegada di Ministerio Publico y Polis Nacional di Peru (PNP) ta responde na un presunto manipulacion den e sistema di benta di carchi electronico pa e plataforma di DDC. Mediante su rednan social, Fiscalia a informa cu Fiscalía Provincial Corporativa Specialisa den Delitonan di Corupcion di Funcionarionan di Cusco ta encarga cu e caso aki.
Minister di Cultura Leslie Urteaga a bisa cu nan ta transferiendo e data pa un plataforma nobo y investigacion riba corupcion na DDC ta continua caminda a haya un desbalansa economico di 8 miyon soles.
“Nos no ta bay back pa e sistema anterior cu tin problemanan serio. E denuncianan corespondiente a ser haci, Polis y Fiscalia ta haciendo nan trabou, tin un proceso cu mester sigui y cu e resultadonan lo tuma un decision.”
Un siman atras, na districto di Machu Picchu companianan di turismo a cuminsa un welga indefini pa e contracto di e plataforma Joinnus cu ta esun cu ta bay emiti e carchinan electronico, sinembargo, dia 31 di januari ultimo a logra un acuerdo y a stop e welga, den e condicionnan ta inclui e fin di e vinculo cu e compania aki, cu e fin di promove un plataforma estatal y duna continuidad na e benta di 1.000 carchi fisico den e pueblo.
Ferrocarril Transandino S.A a anuncia e reanudacion di e operacionnan di nan trein cu ta cubri e ruta Ollantaytamo-Machupicchu-Hidroeléctrica, e decision a ser tuma despues cu a confirma e suspension di e welga, asina como e verificacion di condicionnan di siguridad den e linea di e trein.
