Marina di Peru a intercepta un barco ‘semisumergible’ cu tabata transporta como dos ton di droga y a captura cuatro persona, den un operacion den awa di Oceano Pacifico na parti nort di e pais, asina ministerio di defensa Peruano a declara ayera.
E narcosubmarino a keda intercepta pa un patruya di Marina diasabra pasa na 178 miya nautico di costa di ciudad di Talara, na region Piura, na mil kilometro di capital Lima.
Narcotrafico internacional a cuminsa haci uso tambe di submarino pa transporta droga pa Europa, algo desconoci te awor. Mas tanto ta haci uso di submarino cerca di costa Pacifico pa transporta droga pa Merca, manera den e caso aki. Na fin di november pasa a intercepta pa prome biaha un submarino na Spaña, cu a crusa Atlantico saliendo di Guyana, cu tres ton di cocaina a bordo, cu un valor di mercado di 100 miyon euro.
Na Peru tin cartel Mexicano ta opera manera esun di Sinaloa, y e pais ta produci mas di 400 ton di cocaina pa aña, segun e agencia antidroga Peruano. Despues di Colombia, Peru ta e productor mas grandi di coca, cu casi 50.000 hectar di cultivo, segun e Oficina di Nacionnan Uni contra Droga y Crimen (UNODC).
E region di Amazonia Peruano, na frontera cu Colombia, Brasil y Bolivia, ta e region unda a detecta un expansion fuerte di cultivo di coca. E principal vianan di salida di cocaina di Peru ta a traves di container di mercancia cu ta subi barco na hafnan di El Callao y Paita. Tambe ta transporta coca cu avioneta pa Bolivia, cu ta usa pista di aterisahe clandestino den selva Peruano pa hiba cargamento grandi.
