Minister di Interior di Martin Vizcarra, Carlos Moran, a revela cu a ricibi informacion cu na teritorio Peruano tin delincuentenan Venezolano manda pa e mandatario Nicolas Maduro.
“Mi a ricibi den mi despacho algun colectivo Venezolano cu a ricibi menasa di morto, dirigentenan di comunidad di inmigrante cu tin cierto representacion – mi no lo duna nan nomber – nan a informa mi cu ta hende cu tin vinculo cu Maduro cu a bin menasa, entrega comunicado, acusa di traidor e comunidad Venezolano. Akinan tin un contesta di e gruponan aki, nan ta delincuente cu ta bin na nos pais pa sembra miedo pa su propio hende”, Moran a denuncia.
E funcionario a splica cu, pa via di e denuncianan ricibi, “tin cierto coherencia” cu tin presencia di personahenan relaciona cu e regimen di Maduro cu ta bin menasa e dirigentenan di e comunidad Venezolano.
Tambe a sigura cu e creacion di un polemico brigada special pa combati crimen cometi pa ciudadanonan Venezolano tin como obhetivo e hende criminal aki.
Den contexto aki, na ultimo dianan, Peru a expulsa un grupo di 131 Venezolano, cu tabata deteni pa motibo cu nan tabata implica cu delitonan na ciudad di Lima y Huancayo. Mayoria di nan a ser deteni na un hotel di e beach Punta Negra, unda a descubri un banda cu presuntamente a asesina un Peruano dos siman pasa na Lima.
Di e grupo di persona deteni den operativo policial di Punta Negra, 95 tabata homber, 7 tabata muhe cu tabata investiga pa Direccion di Investigacion Criminal (DIRINCRI) di Polis Nacional, e minister di Interior a informa. E 29 Venezolano (27 homber y 2 muhe) a ser deteni na ciudad Andino di Huancayo pa e situacion di migracion iregular y nan tabata implica cu hechonan delictivo.
