Perspectiva relaciona cu petroleo… Bon noticia ta scars

E siman aki nos bisiñanan na banda pazuid ta keda den noticia. Y noticia cu sigur tin relevancia pa nos. Nos lo tin e eleccion presidencial di diadomingo venidero, pero esey pa straño cu e ta zona, no ta e punto di interes mayor.

Ta imposibel cu e señor di fam bon Antiano y Arubano a organisa henter un show pa e bay perde. Sigur si hopi hende opta pa no bay vota, su fanaticonan si ta bay. Exito garantisa. Naturalmente esey no ta bay cambia nada, e caos economico y hamber ta keda mescos y lo bira mas grave ainda.

Mas interesante ta con for di diferente banda ta trahando riba un strangulacion di e compania mayor cu ta carga tur e peso di e pais. E ultimo sucesonan di ConocoPhillips cu a pone embargo na e islanan ruman ta un problema serio pa Venezuela, cu di mes caba a mira nan industria principal garna for di otro. Manera por lesa den otro noticia den e edicion aki, e pais ta caba na mita miyon bari pa dia bao di e cuota cu nan a haya di OPEC na fin di 2016, den e acuerdo di Viena unda e miembronan di OPEC y entre otro Rusia, a palabra reduci produccion pa pusha prijs internacional mas halto.

Wel, e caida di produccion na Venezuela ta asina grandi cu e otronan no tin tanto preocupacion. Y bayendo fin di e aña aki e perspectiva ey no ta cambia y e falta di e produccion Venezolano lo percura pa prijs di crudo internacional lo no baha facilmente. Ya OPEC a laga sa caba cu e exceso cu tabatin den mercado, y cu tabata mantene prijs abao, a desaparece caba.
Y esey no ta tur.

E confrontacion entre Merca y Iran, sigur si esaki resulta den un embargo Mericano pa crudo Irani, lo percura pa mas scarsedad riba mercado internacional, cu prijs halto corespondiente. Conta acerca otro problema cu tin, manera na Siria cu por lo pronto no ta completamente back in business, mas e insiguridad den cierto pais productor Africano, anto nos tin un scenario bastante fastioso pa nos como consumidor… Y nos ta pagando 2 florin pa liter caba… Si en berdad nos ta bay pa un aumento di accijns tambe, anto prijs di combustibel lo bay bira un factor serio pa tene cuenta cu ne.

Ta imaginabel cu esaki, hunto cu e aumento di BBO/BAZV ta deshaci facilmente di e apenas 1% cu nos economia lo a crece, segun e proyeccion preliminar di Banco Central. Banda di esey, tin e promesa di baha prijs di awa y coriente, pero cu posiblemente un aumento den prijs di heavy fuel oil cu WEB ta consumi, esaki por bira dificil pa realisa.

Anto nos no a papia ainda tocante e consecuencianan ainda pa e proyecto di Pdvsa na San Nicolas, cu a dal para prome cu e ultimo acontecimentonan aki. For di fuente bon informa nos ta comprende cu no tin mucho actividad riba e tereno, y esey no por ta otro tampoco. Simplemente no tin placa pa haci nada, tin restriccion Mericano riba e actividadnan, y hopi lo bay depende di un eventual cambio politico cu por tuma luga, si e regimen aki desaparece. Y ainda e ora nos lo bay tin un situacion compleho, unda e gobierno nobo lo bay establece prioridad den loke nan mester haci pa pone nan industria petrolero ariba pia atrobe.

Di esey lo bay depende si nan ta mira un posibilidad pa uza e refineria na Aruba como upgrader, mientras nan ta sigui traha riba aumenta e cantidad di upgrader na nan pais mes. Nan programa strategico pa cu esaki a cay completamente atras den e 19 aña cu e comunistanan di Chavez y Maduro tabata na mando, y a haci tal desaster, cu ni cu nan ta desea nan no por expande nan capacidad actualmente. Na prome instante nan, es decir e actual oposicion, lo no ta tanto contento cu e acuerdo cu Aruba, pasobra e acuerdo aki, segun varios politico di oposicion, nan ta mir’e manera un cos gekonkel entre Maduro y Eman. E mester a haya aprobacion di parlamento, esun berdadero y no e circo estilo Cubano cu Nicolas Maduro a crea aña pasa, y esaki no a sucede.

Pues un opcion ta pa no reconoce e acuerdo completamente, pero por ta cu nan ta mira e otro bentahanan cu tin na Aruba, cu ta por ehemplo e terminal di almacena crudo, cu ta algo cu den futuro Venezuela ta keda depende ariba. No ta mira cu por lo pronto Venezuela mes lo tin mas capacidad di puerto di profundidad pa maneha VLCC. Ta p’esey nan a end up na e islanan cu si tin esey.

Di tur manera, na Aruba nos mester bay contempla seriamente si nos mester ta dispuesto di laga un industria hopi contaminante bay opera pa tempo limita, te ora Venezuela tin su upgradernan cla, anto e ora ey si, definitivamente nos lo mester bay ruim op de boel. Honestamente, nos ta kere den ruim op e boel awor, y no aki 15 o 20 aña. Ban concentra riba actividad limpi na San Nicolas.