Aña 2016 a termina cu economia di Aruba den un slump. Segun Banco Central, economia lo a bay atras pa loke ta GDP nominal cu -1,3%, pero un deflacion lo a hiba nos ainda na un crecemento modera di GDP real di 0,4%. Pero esey lo tabata si e inversion den e rehabilitacion di e refineria lo a inicia den ultimo tres luna di aña. Esey no tabata e caso. Loke a sucede ta solamente e traspaso di personal pa Refineria di Aruba NV, y pa Citgo Aruba Refining NV, procedente di e diferente companianan di Valero. Tambe caha di gobierno a ricibi placa di e settlement di impuesto y otro responsabilidad financiero di Valero, y e parti di e lease for di Citgo. Esey a bay caba den e gastonan extra gubernamental a base di e presupuesto complementario.
Un pregunta clave ta kico realmente por spera di e inicio di e trabaonan di rehabilitacion; cuanto entrada di capital nos por spera a base di esaki? Na september 2016 caba, den su Economic Outlook pa 2016, Banco Central ta adverti pa demasiado optimismo. “E baseline scenario ta tuma na cuenta cu e restart di e refineria lo no haci un contribucion asina grandi na Net Foreign Assets (NFA; activo netto di exterior)durante e periodo 2016‐2018 ya cu procesamento lo ta limita, y solamente fondo pa paga salario lo drenta (un Afl. 7 miyon calcula pa 2016 y Afl. 22 miyon pa 2017‐2018).” Uzando un averahe di e saldo general pa sector di petroleo pa e periodo 2000 – 2008, ta proyecta cu e refineria por contribui cu un entrada anual netto di fondo di exterior cerca di Afl. 74 miyon cuminsando na 2019.”
Esaki ta impresionante? No tanto, si nos compara esey cu por ehemplo un solo proyecto den telecomunicacion cu un di e empresanan existente kier haci den crea otro sistema di cable, cu ta abarca un inversion di alrededor di US$ 50 miyon. Un biaha so, naturalmente, pero e ta mas cu loke e refineria lo ta trece aden den un aña… Nos ta keda cu e panorama realistico, cu e rehabilitacion ta duna cierto empleo fuerte pa un tempo cortico, y despues den e operacion diario di e ‘upgrader’ por conta cu no ta yega na e tamaño di payroll cu Valero tabatin den su ultimo añanan.
Manera bisa na varios ocasion, tur cos ta depende actualmente con lihe e proceso di rehabilitacion na e refineria por cuminsa. Pa esaki mester tira un bista riba e companianan cu PDVSA/Citgo a selecciona pa haci e trabao: e empresa Frances Technip, y e empresanan Venezolano Y&V y Tecnoconsult. Tur tres tin por lo bisto un reputacion bastante bon y tin un relacion di trabao bastante extenso cu PDVSA. Por cierto, Y&V, como unico empresa Venezolano, ta envolvi caba den otro proyecto grandi di PDVSA na Venezuela mes. Ta trata aki di crea mas di 200 pos di petroleo den e faha di Orinoco, den colaboracion tambe cu e empresa Ruso Rosneft y e empresa Spaño Repsol, unda ambos tin joint venture cu PDVSA.
Segun un informe di Bloomberg, e proyecto aki ta e prome cu un tipo nobo di contracto, cu ta encera cu e compania estatal (PDVSA) no mester pone capital inicial, ya cu e acuerdo ta cu e contratista(nan) lo percura pa fia placa, anto ta haya nan pago ora cu e proyecto cuminsa produci. Aparentemente e intencion ta pa na Aruba tambe bay den un acuerdo similar, cu pago despues ora cu e planta cuminsa opera.
A primera bista, esey ta mustra bastante safe pa Aruba, ya cu den caso di incumplimento lo ta un asunto entre e contratistanan y PDVSA/Citgo. Pero prome cu tur cos, e empresanan aki mester haya e financiamento pa e proyectonan, y esey den un situacion di incertidumbre grandi general na Venezuela, y como agravante e situacion financiero pesimo di PDVSA mes, cu ta recuri na e forma di financia aki, pasobra nan mes no por haya placa fia. Agencia Reuters a acerca tanto PDVSA como e contratistanan pero no por a haya nan reaccion riba e deal anuncia na Aruba net prome cu aña caba. E impresion ta cu tin un acuerdo, pero cu e contratistanan no a sigura e prestamo necesario pa implementa e trabao ainda. Segun cu esey por tuma luga rapidamente, of no, lo por mira accion na e refineria mes.
Sin embargo, tumando na cuenta loke Banco Central a trece dilanti, e empleo extra cu e rehabilitacion lo duna, y loke e ta trece na beneficio pa gobierno na impuesto y prima, no ta suficiente pa deshaci di e caida den turismo y den consumo local. Por bisa cu no ta recomendabel pa spera di un industria cu den propaganda mas optimista di gobierno tabata representa 12 – 15% di GDP, y cu ta bolbe den economia den forma simplifica (upgrader vs full fledged refinery), cu esaki lo bay haci milagro pa e resto di economia cu ta casi completamente liga na turismo. Ta haciendo falta awor un analisis contundente di nos ‘core business’, cu ta turismo.
