E aña aki, actividad economico den sector di energia, esun principal di e pais Caribense, a aumenta den e di tres trimester ora cu e proyecto offshor Juniper di British Petroleum (BP) a cuminsa opera, aunke lo mester warda ainda pa por mira si esaki a genera mas actividad economico den otro sectornan tambe.
En todo caso e proyecto Juniper a yuda aumenta produccion di gas natural te na e nivel mas halto den dos aña na september ultimo. Den e parti di downstream (procesamento, mercadeo y distribucion), produccion di liquified natural gas (LNG) a acerca e produccion mas halto te awor na juli ultimo. Den e sectornan cu no ta energia, sin embargo, e perspectivanan ta keda debil. Aumento di credito den sector priva tabata modera, cu prestamo na empresa desanima. Ta anticipa cu e presupuesto di e aña entrante lo bay enfrenta e desbalance fiscal fuerte cu un serie di impuesto nobo, royalties riba gas natural y subsidio mas abao riba combustibel.
Crecimento economico 2018
Pa 2018 ta anticipa un crecemento mas fuerte di GDP, basa primordialmente riba benta di gas natural, permitiendo e pais di sali di e recesion di varios aña. Durante 2014 te cu 2016, e pais a conoce un recesion di -1,0% di GDP na 2014, – 0,6% na 2015, y -2,3% na 2016. Un demanda robusto pa gas natural lo mester apoya e crecemento den sector energetico, mientras cu ta spera cu esaki lo tin influencia tambe riba e otro sectornan. Ta spera un aumento di GDP di 2,5% otro aña, y 2,7% na 2019.
Trinidad & Tobago tin alrededor di 1,4 miyon habitante, un nivel di debe publico di 57,9% di GDP, un GDP di mas o menos US$ 25.000 miyon, y un GDP per capita di alrededor di US$ 19.000.
