Personanan ta sigui cubri pa AZV: Si nan a diligencia prolongacion di permiso na tempo

Ministerio di husticia ta hayando hopi pregunta relaciona cu e servicio cu DIMAS ta brinda na comunidad, ya cu actualmente debi na e crisis di coronavirus/Covid-19, e departamento aki ta trahando cu un minimo di personal.

E preguntanan mas tanto tin di haci cu personanan cu nan permiso, sea cu ta bay caduca of nan a caduca caba. Igualmente nan ta puntra riba status di nan permiso y con nan lo atende cu esaki.

Minister di Husticia, Andin Bikker a contesta pregunta di Bon Dia Aruba bisando cu esunnan cu ainda nan permiso no a caduca, pero cu nan mester haci nan cita digitalmente pa cumpli cu e regla di tres luna prome cu nan permiso ta caduca, pero actualmente no ta posibel pa hacie, ya cu nan sistema no ta duna chens pa haci’e.

E mandatario a bisa cu a duna chens te cu 9 di april pa haci cita via e sistema online di DIMAS pa asina e persona por cuminsa cu nan proceso di peticion di permiso. Loke el a compronde for di DIMAS CU bo por haci cita atrobe. Sinembargo debi na e situacion actual di COVID-19, e mandatario ta recomenda e persona cu ta den e situacion aki pa nan por manda un e-mail na info@dimasaruba.aw Of tambe bo por yama e linea di emergencia pa atende cu nan caso

Igualmente Bikker a agrega cu den e reglamento di DIMAS ta para cu un persona cu mester renoba su permiso, e mester entrega su peticion idealmente tres luna di antemano, prome cu e permiso caduca. Igualmente e ley den e ley di AZV ta para cu ora un persona a entrega su peticion pa prolongacion di su permiso na tempo, e persona ta sigui wordo cubri pa AZV.

E declaracion aki ta trece trankilidad na e grupo di persona cu ya caba a diligencia su peticion di renobacion caba, pero ainda su permiso no a bin cla debi na e situacion actual cu nan ta trahando cu minimo di personal como protocol di bio-siguridad contra coronavirus.

Sinembargo el a laga sa cu e tematica di un grupo cu ta wordo afecta actualmente ta personanan cu no a observa di entrega nan aplicacion prome cu nan permiso a caduca. Es decir nan a tarda y nan permiso a caduca. El a bisa cu e proceso no a cambia pa nan si e coronavirus no a bin dia 13 di maart ultimo. Si e persona no a aplica na tempo y nan permiso a caduca, e tardamento di prolongacion di e aplicacion ta bay di e manera normal.