Director di Banco di Seguro Social (SVb), Edwin Jacobs a splica cu tin situacion cu ta wordo presenta cu e ayudonan otorga di FASE y tambe esun di subsidio di trabao. SVb ta participa den e programanan aki di sosten financiero pa empresanan y trahadonan.
Jacobs a aclaria cu tin situacion caminda companianan cu den luna di april a aplica ‘no work, no pay’, nan trahadonan na e momento ey a bin na remarca pa e pago di FASE. Pero si na luna di mei e trahado ta bay aplica pa e subsidio di salario, esaki ta nifica cu e persona pa luna di mei no por ricibi e suma di FASE. Pero si e ta ricibi e subsidio di salario.
SVb door di su rol tanto den FASE y di subsidio di salario ta esun encarga pa controla cu e pago aki no ta sosode dobel. Igualmente nan ta controla cu personanan cu cerca SVb riba nan lista di AO ta ricibiendo actualmente un pago for di seguro di malesa. Tampoco nan ta cobra e FASE ni e subsidio di salario, asina Jacobs a laga sa.
