(AP) – Mirando cu e investigacionnan tocante e tiramentonan recien cada biaha ta trece dilanti mas y mas advertencia cu no a ser mira prome cu e tiramentonan aki a tuma luga, estado di New York a cuminsa cu un strategia nobo pa revisa aplicantenan cu kier un permiso pa tin arma di candela.
Personanan cu kier carga arma di candela lo mester entrega un lista di nan cuentanan riba redman social pa un evaluacion di nan “caracter y conducta.”
E ta un strategia aplaudi pa varios democrata y gruponan cu ta boga pa mas control di arma di candela, sinembargo algun experto a trece dilanti preguntanan y dudanan tocante con e ley aki lo ser aplica y a trata preocupacionnan pa cu libertad di expresion.
Algun di e oficialnan cu lo ricibi e tarea di revisa e contenido di e rednan social tambe mester puntra si nan lo tin e recurso pa haci esaki, y den algun caso, si e ley ta constitucional. Cuerpo policial no a ricibi placa adicional ni tampoco empleadonan pa trata cu e proceso nobo aki di aplicacion, segun Peter Kehoe, e director ehecutivo di New York Sheriffs Association. E ley, el a insisti, ta trata cu e derechonan di e di dos amienda y mientras e aplicantenan mester duna e lista di nan cuentanan di red social, e no ta pensa cu e oficialnan lo necesariamente revisa esaki.
“Mi no ta kere nos lo haci esaki,” Kehoe a bisa. “Mi ta kere cu e lo ta un invasion constitucional di e persona su privacidad.”
E requisito aki, cual ta drenta den efecto den september, a ser inclui den un ley cu a ser aproba siman pasa pa asina preserva algun limite tocante arma di candela, despues cu Corte Supremo a declara cu mayoria persona tin e derecho di carga un arma di candela pa proteccion personal. El a ser firma pa Gobernador Kathy Hochul, un democrata, ken a nota cu e personanan cu ta ehecuta e tiramento hopi biaha ta expresa nan intencion pa causa daño na otronan di un manera of otro.
