Ayera un grupo di personal di Centro Multi Disciplinario Aruba a bay parlamento pa asina entrega un documento na minister president.
Ta asina cu na comienso di aña 2018 e grupo di MDC tabata tin diferente intento pa asina yega na entendimento cu minister di enseñansa, pa asina wak kico ta su intencion, vision pa locual ta trata rol di Centro Multi Disciplinario Aruba y di henter e sistema di enseñansa.
Magaly Brito, secretaria general di SEPPA a splica cu cada biaha e minister ta cambia cosnan, mescos den situacion di Traimerdia, pero ultimo el a tuma e decision cu e ta haci un di e departamentonan di MDC mas chikito, na luga di reenforsa MDC pa nan brinda un miho servicio na comunidad.
Brito ta bisa na luga cu e mandatario scucha e profesionalnan na pia di trabou, of mira con e por hiba e servicio cu nan ta duna den un miho direccion, e ta dicidi claramente ta kita di aki aya y ta zwak e servicio. Esaki ta conduci cu awe e empleadonan a cansa di purba, y pa e motibo aki a dicidi di entrega minister president un documento caminda detayadamente ta splica kico tabata e intentonan di 2018 y e reaccionnan. E documento ta mustra cu e direccionnan aki no ta cumbini pais Aruba y nos muchanan cu ta depende grandemente di e servicionan cu ta wordo duna na MDC y nos scolnan.
Prome minister a bisa cu esaki ta un momento grandi y no ta su materia, y a bisa cu nan ta trahando cu un gobierno y ministerionan hopi chikito y hopi compacto. E prome mandatario a sigui bisa cu “nos ta bay cu hopi menos consehero hustamente pa motibo cu nos ta kere cu e materianan mester wordo atendi pa e minister encarga cu e cartera.”
Brito ta bisa cu esaki ta un bon reaccion di prome minister y ta spera cu e prome mandatario por haci algo, pero na mes momento lo entrega un copia di e documento na parlamento di Aruba. Brito a bisa cu e trahadonan kier mustra cu ta a haci nan maximo esfuerso pa asina por tin e debido atencion pa e servicio aki cu ta ser duna y pa sali na bienestar di nos muchanan.
