Director medico di Horario Oduber Hospital Ezzard Cilié tabata masha directo den su discurso den cuadro di apertura di Siman di Enfermeria.  El a destaca cu e rol crucial den cuido ta keda e trahadonan di enfermeria cu dia 12 di mei ta celebra nan dia.

El a probecha e oportunidad aki pa laga sa cu e grupo di enfermeria y esunnan cu ta directamente envolvi den e cuido directo di e pashent ta pasando den retonan “basta pisa e aña aki”. E reto ta cu e trabou a bira pisa pa nan y por lo pronto e no ta wak cambio pronto. Segun sr. Cilié, ta responsabilidad di Conseho di Directiva pa haci algo pa atende cu e situacion aki.

El  a destaca e esfuerso cu trahadonan di enfermeria ta haciendo. El a trece como ehempel cu den un anochi tin biaha nan ta tuma of atende 15 pashent; mientras cu nan tin e capacidad di tuma solamente 5 pashent. “Ami no sa di unda boso nan ta saca e esfuerso, forsa y creatividad pa boso nan  acapara e 15 persona ey cu mester di nos”.

E director medico ta haya cu e no ta un secreto mas cu e trahadonan di enfermeria ta cargando e peso di e trabou  ya cu “nos no tin e suficiente mannan pa acapara esey”.  E ta reconoce e esfuerso cu enfermeronan ta realisando. E situacion actual ta demanda cu nan mester pone bon tino si locual nan  ta haciendo ainda ta responsabel si of no, ya cu e no ta un contesta facil.

Sr. Cilié a abstene di menciona nomber pero e ta haya cu tin hendenan cu por yuda nan pa trece un solucion na e situacion actual. “Nos no por sigui e rumbo cu nos ta bay.” El a agrega cu e grupo di enfermeria no por carga e peso cu e ta pretende di carga aworaki, y tin mas hende cu ta carga e mesun pensamento aki.

E director a duna danki na tur esunnan cu ta yudando actualmente; y cu ta haciendo lo ultimo cu ta posibel cerca nan pa tene e pashent na prome luga. Nan ta haciendo “casi e imposibel” pa no laga nos pashentnan na caya.

Tambe el a remarca  den e siman aki a wordo traha un programa cu hopi actividad. P’esey nan ta tuma un siman pa celebra, ya cu ta hopi esunnan  cu ta cay den e categoria di enfermeria. E no ta celebracion so; sino cu tur personal trahado den e tereno aki sea consciente di nan existencia pa cu e profesion cu nan ta eherce; sin ningun excepcion. “Pashent semper ta bay prome.”

E ta haya cu  enfermero ta nifica tur cos pa e pashent y aunke e medico ta dirigi, “nunca e por dirigi su so” ya cu e mester di enfermero pa zorg pa e trabou y cuido tuma luga tambe. Pues e punto central y e rason di e profesion di enfermeria su existencia ta e pashent.

Na final di su discurso el a haci un yamado pa tur trahado den enfermeria no solamente disfruta y participa di e siman aki dedica na nan; sino tambe pa nan reconcilia y refleha kico ta nifica nan profesion muy specialmente den e circunstancia actual.

Minister ta pidi pa plan pa yega vacatura
Di su banda e mandatario encarga cu Salubridad Publico, Alex Schwengle a pidi pa Consehonan di Directivia y di Supervision presenta un plan pa yena e vacatura cu tin den enfermeria. El a laga sa cu gobierno tin e placa disponibel pa atende cu e situacion aki; pero e kier wak prome un plan.

E mandatario a laga sa cu e ta wardando e plan magno di hospital. E no sa dicon e proceso aki no a tuma luga, ya cu e ta puntrando hospital, unda e plan ta? E contesta cu e ta haya ta cu nan ta casi cla cu ne; mientras Bon Dia Aruba por compronde  for di Conseho di Directiva cu e plan ta cla y cu esaki a wordo entrega na AZV cu ta nan principal cliente.

“Mi a boga e Raad van Bestuur y Raad van Toezicht pa nan entrega mas pronto posibel nan plan con nan ta bay mehora esey”. E ta wardando riba e plan ainda ya cu nan a palabra y anticipa caba via AZV pa destina extra fondo pa AZV pa e añanan venidero. E aña aki gobierno a aloca enbes di 3% un 7% di crecemento den gasto, locual e ta considera un crecemento substancial. Pero nan intencion ta pa baha e gasto bek gradualmente te cu un 3% cu ta e cifra porceltual cu instancia grandi ta recomenda ora cu un pais ta dispone di un sistema moderno y bon control.

“Y Aruba tin un sistema moderno”, segun e minister. E ta considera e gasto di un 3% como un “cifra magico” cu no mester baha mas cu esey. Ya cu añanan cu nan tabatin dificultad financiero nan a baha e crecemento di nan gasto na 1% of menos, pero esaki a trece su consecuencianan. Pa recompensa e añanan duro ey nan a aumenta te cu un 7% e espacio financiero pa cuido.

Falta di personal algo structural
E mandatario ta bisa Bon Dia Aruba cu  e problema di falta di personal den hospital, ta un preocupacion di semper y e no ta nada nobo. E ta haya cu mester ta cauteloso pa no kere cu ta awor tin un crisis ya cu tin añanan caba cu e maneho of directiva anterior a dicidi di baha gasto di personal den hospital. Ta asina cu a bin un plan pa manda hopi hende na cas sin haci un bon analisis riba e necesidad ta den  realidad.

For di mas cu 10 aña pasa e mandatario a señala cu hospital tin un scarsedad grandi den enfermeria. Awor nan ta premira cu ta bira tempo pa busca mas personal mirando cu hospital nobo ta biniendo. Esaki ta demanda un plan concreto riba con nan ta bay mehora e servicio di e pashent na cama; y esey no por sin enfermeria.

E situacion aki tin dos banda –segun e mandatario- un cualitativo y otro cuantitativo. El a añadi cu e manera cualitativo ta tumando luga caba ya cu e personal ta hayando cursonan di capacitacion duna pa academianan renombra riba cuido di pashent pa asina up date e trahadonan den enfermeria. Pero riba e parti cuantitativo e ta reconoce cu ta falta nurse. Ya cu di un banda tambe nos hobennan no ta mucho motiva pa traha den enfermeria y mester busca personal di afo y no ta facil pa haya nan tambe.