No tin proceso skirbi pa maneha gasto di overtime, segun ARA

Cuerpo Especial Arubano ta confronta falta di personal, pero un absentismo cu ta nifica un averahe di mas di 50 dia malo pa aña pa trahado. Consecuentemente, esaki tin impacto riba su gasto di overtime.

CEA a conoce un fluctuacion di gasto di personal den e cinco añanan cu Auditoria General di Aruba, ARA, a analisa pa su rapport ‘Motibonan di Overtime.’

ARA a enfoca riba tres departamento specifico pa ilustra con e gasto di overtime a desaroya. E rapport ta di 2018 y a keda elabora riba iniciativa di e instituto mes, cu ainda ta pendiente pa Parlamento haci pregunta y reuni cu e instancia pa asina yega na recomendacionnan pa Pais Aruba.

20 porciento

Den caso di Cuerpo Especial Arubano, CEA, overtime ta pisa hopi riba gasto di personal. E ta 20 porciento di e gasto di personal total, y ta basa riba un crecemento di 1.2 porciento entre 2014 pa 2018, cu e aumento real mas grandi di gasto di overtime na 2017, unda a registra un aumento drastico di 15 porciento. ARA no a investiga motibonan di e aumento drastico aki. E momentonan ‘piek’ tabata na luna April y Juli 2017, cu ta representa un total di 252 mil y 229 mil florin cada uno, compara cu lunanan den e mesun periodo. No tabata splicacion di parti di CEA pa e sumanan aki, a pesar cu ARA a haci peticion pa ricibi mas detaye pakico e sumanan aki ta asina halto. Sinembargo, na 2018 tabata un reduccion cla den gasto di overtime.

Mescos cu ta e caso na KIA y KPA, tin diferente motibo pakico CEA a confronta e necesidad pa paga overtime. E motibonan ta basa riba tarea di e organisacion y personal.

Tarea CEA

Segun e ley di CEA, e meta di e organisacion ta pa duna servicio na Pais Aruba en general y specificamente na e departamentonan encarga cu mantencion di ordo. CEA mester eherce tareanan riba cuido y brinda siguridad na material y personal. Banda di e maneho, CEA ta consisti di e seccion Cuido y Siguridad y tambe Administracion.

CEA ta brinda siguridad y cuido na edificionan y proyectonan temporario. Ademas CEA ta encarga cu cuido y siguridad special na Gobernador, Bestuurskantoor y KIA., y ta brinda sosten ehecutivo cu ta consisti di planificadonan entre otro.

E seccion di Cuido y Siguridad General ta responsabel pa 11 ubicacion, cu ta e garage di Polis na Balashi y Direccion Voogdijraad. E seccion Cuido y Siguridad Special ta responsabel pa 13 ubicacion, entre otro Parlamento.

CEA como tal tambe ta brinda conseho riba e siguridad y cuido di tur persona cu ta opera den e edificionan, incluso funcionarionan di Gobierno y nan famia. Y basa riba peticion, nan por brinda asistencia na servicionan cu ta traha den e area di combatimento di criminalidad, manera KIA, pero tambe por duna asistencia na momento di calamidad y situacionnan di emergencia. Di e forma aki tambe CEA ta keda envolvi por ehempel, si un persona mester scapa for di KIA. Tambe CEA ta responsabel pa implementacion di plan y tecnica di plannan pa siguridad, formulacion di guia pa e personal di CEA, y conseha riba compra y aplicacion di instrumentonan tecnico, cu ta inclui medionan di comunicacion. Planificacion di Cuido di funcionarionan y e factornan di mitiga risico ta sosode conhuntamente cu KPA.

Den e sentido ey, CEA ta funciona den e cuadro di cadena di husticia, y no tur ora ta opera den oranan regular. Consecuentemente e tipo di trabao ta conduci na overtime.

Absentismo

CEA a indica cu tin un situacion di embehecimento den e organisacion. Mayoria di e personal ta riba 40, y como 40 porciento ta riba 50. Consecuentemente tin mas problema di salud cu ta afecta e grado di absentismo, cu tin influencia riba overtime.

Na 2018, CEA a raporta 1710 yamada pa motibo di malesa, cu a resulta den un total di 7146 dia ausente. Si sali di e punto di bista cu CEA tabatin 134 trahando na 2018, e ta un averahe di casi 13 biaha cu cada trahado ta yama malo cu un total di 53 dia ausente pa aña.

Aunke cu no a menciona falta di personal como motibo principal di overtime, ARA a constata cu falta personal den CEA. Segun e rapport di formacion cu ainda no ta formalisa, mester di 168 empleado tempo completo y na 2018, tabatin 134. Falta particularmente personal pa funcionnan di liderazgo,

Ademas, durante curso di añanan, CEA a conoce hopi movecion den su personal, unda varios tabata bandona e operacion, cu a contribui tambe na e falta di hende, cu atrobe ta influencia e overtime. Hopi a bay pa otro servicio den Gobierno, a tuma VUT of a yega edad di pensioen. Mescos cu ta e caso na diferente organisacion publico, algun di CEA a bay traha na disposicion di e Minister encarga.

Medidanan pa control

CEA mes ta responsabel pa tuma medidanan interno pa controla gasto di overtime. Manera ta e caso cu KPA y KIA, e despacho di Minister no ta traha maneho pa mitiga overtime. Locual ta haci ta adapta presupuesto y ta aloca mas fondo den e presupuesto complementario pa cubri e gastonan di overtime. Na CEA, esnan den schaal 9 of mas no ta bin na remarca pa pago di overtime.

Proceso no ta skirbi

CEA a informa ARA cu tin un maneho interno pa controla overtime, pero no tin esaki describi den un documento. E maneho ta conoci na esnan encarga cu planificacion, coordinacion y lidernan di e diferente ekiponan. Pero, esaki tin mas di haber cu determina ken ta bin na remarca pa overtime y e condicionnan. Entre otro a determina cu e cantidad maximo di oranan di overtime ta 40 ora pa luna. Esnan cu surpasa e quote no por traha riba dianan festivo ni dianan di descanso pa asina limita overtime, aunke cu esnan cu tur ora ta yama malo y surpasa cu limite pa por traha overtime, toch lo bin na remarca den caso cu falta hende. ARA ta kere cu mester skirbi e procesonan cu ta conta pa CEA.

Locual ta complica e trabao di CEA ta cu si no logra e minimo cantidad di hende pa un ubicacion of trabao, lo mester stop cuido y siguridad na e sitio y aplica e sistema ambulante. Pero e tin consecuencia pa e nivel di siguridad.