Personal di Aduana staciona na Aeropuerto Reina Beatrix a tene un accion di protesta pa expresa nan mal contento cu Triple A,  cu ta maneha e terminal aereo aki. E disgusto di personal di e cuerpo uniforma aki tin di haber cu e cambionan cu ta tumando luga den e sala di yegada di pasahero, caminda e lokaal cu nan tabatin pa Aduana realisa nan trabou administrativo a wordo otorga  na e companianan di car rental.

Ayera banda di 6or y mey atardi, despues di sostene un reunion cu gerencia di aeropuerto, presidente di SADA, Edward Maduro a declara na Bon Dia Aruba cu nan a trece nan punto di bista na minister concerni cu lo reuni den seno di gobierno cu gerencia di Triple A pa evalua y tuma un decision riba kico lo bay sosode.

E accion a stop den oranan di merdia pero e miembronan di SADA tin nan puntonan cu nan lo expresa preto riba blanco den un carta cu nan lo manda awe mainta pa e directiva di Duana. Maduro a indica cu e carta aki lo contene e puntonan y posicion di e miembronan di SADA, y despues nan mester warda un contesta formal tambe. Pero el a laga sa cu tanten cu nan no ta manda e carta, nan no por divulga e contenido di dje.  Ayera tardi, Bon Dia Aruba a purba di busca e banda di Triple A tambe pa medio di nan PR, pero e no tabata posibel.

Malcontento
Ya caba presidente di SADA, e sindicalista Edward Maduro a yega di expresa su preocupacion, ya cu nan ta sinti cu nan ta perdiendo autoridad,  e peso  y respet cu Duana tabatin den comunidad. Ya cu mescos cu Polis, nan ta un cuerpo uniforma cu tin autoridad pa eherce e leynan .  E no ta facil –segun Maduro- ya cu tin hendenan cu no ta gusta pa nan ehecuta nan trabou di control pa ehempel na aeropuerto, pero esey ta parti di nan trabou cu nan a huramenta pe. E situacion cu nan ta confronta na waf di Barcadera y na aeropuerto ta afecta nan. Nan ta wak un Triple A cu ta yega ta traha y bin cu un car rental den nan localidad, e ta haya  cu “den ningun parti di mundo bo ta wak e cos aki”.

E sindicalista ta haya cu e parti di comunicacion y respet ta esencial pa resolve diferente asunto cu tin di haber cu e departamento aki cu ta un di e principal fuentenan generado di entrada pa caha di gobierno.  Ya cu ora cu tin cos cu ta bay fout mester comunica cu nan y no neglisha nan ya cu esaki ta esun cu ta produci un mal contento den e cuerpo aki.

E situacion cu nan ta pasando aden tanto na Barcadera como na aeropuerto ta cosnan cu ta pisa. Maduro a expresa e disgusto aki na prensa den cuadro di nan dia internacional.  El a vocifera nan disgusto no solamente como miembro di e directiva di sindicato SADA, pero di tur e miembronan cu ta carga e cuerpo, ya cu loke ta tumando luga no por ta posibel.

Nan ta haya cu e director di e departamento aki mester bay mas fuerte pa defini y defende cual ta nan trabou.  Nan no por laga cualkier hende defini con como cuerpo uniforma nan mester haci nan trabou. “Nos no ta guli e parti cu ta bisa, ya e airport no ta di nos”, el a yega di expresa.  E ta bisa cu berdad e aeropuerto no ta di nan, pero airport no por draai sin Duana  y sin Inmigracion.

E sindicalista ta haya cu Duana como departamento mester bay mas fuerte y mustra Triple A cu nan ta un cuerpo di autoridad y uniforma, caminda cu nan mester refleha esaki.

Mediador di Gobierno
Buscando e diferente angulo di e noticia aki, Bon Dia Aruba  a consulta Mediador di Gobierno  sr. Anselmo Pontilius, kende a laga sa cu te ainda  niun di e partinan envolvi a solicita su intermediacion riba e impasse entre duaneronan y Triple A.  E no sa si berdaderamente tin un espacio pa Mediador atende cu esaki; pasobra aworaki ta dificil pa e husga e parti aki.  For di aña pasa e ta corda cu tabatin diferencia di opinion entre Tiple A  y e servicio di Duana pa loke ta trata establecimento di negoshinan den e area caminda e pasaheronan ta yega.

El a recorda cu den temporada di Pasco ultimo cu SADA a bin cu un accion riba proceso di reorganisacion di e departamento aki, Mediador di Gobierno a pone su mes disponibel pa yuda pa e proceso aki por cana. E ta haya cu si talbes nan a yama ayera mainta te merdia, Mediador di Gobierno tabata atendiendo un asunto cu gerencia di Elmar y nan sindicato riba cambio di e statutonan di nan fondo di pensioen.