(CuraçaoChronicle) – Empleadonan di Aduana pronto ta bay ricibi nan pago di overtime y uitkering pa cuminda pa e prome lunanan di e aña aki. Esaki a keda anuncia pa minister di Finanzas, Javier Silvania, kende a bisa cu el a aproba e pago.
Den dianan recien tabatin malcontento entre oficialnan di Aduana. Via mensahenan di Facebook, e minister a anuncia cu el a pone e firmanan necesario y cu a entrega e documento na e Ministerio di Maneho, Planificacion y Servicio. Ta trata aki di 131 solicitud di empleadonan. Silvania ta pidi nan pa compronde e retraso.
E siman aki, un reunion cu sindicato di Aduana, STRaF ta riba agenda. Durante e reunion, ta bay discuti asutonan di personal y e progreso di e files di personal.
Na e momento aki, 38 file di empleadonan ta siendo procesa en conexion cu, entre otro asunto, beneficionan y uitkering. Desde mita di maart ultimo, dos gruponan di tarea special ta activo cu ta trata cu e maneho di e files di personal pendiente.
