– 10 miyon florin e grupo di 40 trahado a pone como multa den e caso Insel Air no ta cumpli cu su debenan financiero, primordialmente e pago di pensioen. Di otro banda e compania a indica cu nan ta keda dispuesto pa sinta na mesa pa yega na un solucion. E caso a bay corte ayera.
Insel Air kier habri porta pa un comision pero empleadonan cu a entama caso kier wordo paga awo pasobra nan no tin garantia cu nan ta bay haya nan placa. Hues a cera e tratamento di e caso pa dicta sentencia proximo diaranson 14 di december.
David Kock, abogado den defensa di e trahadonan ta splica Bon Dia Aruba cu esaki ta un caso unda cu empleadonan a constata cu pa un tempo basta largo caba nan impuestonan no ta bay Departamento di Impuesto. Pero mas importante e dunado di trabou no ta paga nan parti di pensioen y asina nan ta perde placa tambe, den forma di interes.
Riba tur esaki segun sr. Kock, algun di nan no ta ni registra na Guardian Life como empleado. “Bo ta puntra bo mes e ora ey ta unda e placa ey eigenlijk ta bay?” Segun e abogado e ta cla cu e placa aki nan ta uza pa e operacion di e compania. Den corte e compania a admiti cu nan situacion financiero ta dificil, sr. Kock ta bisa, agregando cu: “Nan tin miedo cu si hues duna e veredicto cu nos ta spera tambe cu e tin cu duna, cu e compania hasta ta bin den problema financiero cu e no lo por sigui. Naturalmente esey por ta un realidad financiero di nan pero esey no ta culpa di e trahadonan. Placa di trahadonan no tabata mag di wordo uza pa operacion di Insel Air.”
Multa di 10 miyon
Insel Air a pidi pa nan haya 24 luna entrante januari pa paga tur e debe. Sr. Kock ta bisa cu nan realmente no ta kere den esey pasobra si tempo cu a inicia cu operacion anto tur cos tabata bon nan no por a paga, kico por spera awo cu ta bisando cu cos ta malo anto riba dje cu mester corta ruta y haci algun otro ahustacion. E 40 empleado aki no ta di acuerdo anto nan kier nan pago pasobra nan tin miedo segun sr. Kock cu mañan e compania ta stop of bay bancarota anto nan ta perde tur nan placa. “Nos ta spera cu hues ta ordena Insel pa paga y nos ta pidi pa pone un multa maximo di 10 miyon florin pa nan paga. Naturalmente porta e multa ey no ta bay wordo cobra pasobra si Insel Air no por paga impuesto, nan no lo por haci e. Pero bo mester tin un ‘prikkel’ pasobra si bo djis bay bisa nan cu nan tin cu paga, nan tabata sa esey caba anto nan no a hacie.”
Retraso di pago a bira menos
Segun abogado na defensa di Insel Air Arlene Schippers ta bisa Bon Dia Aruba: “Si bo ta bisa cu bo mester paga tur cos e luna aki, otro cosnan no por wordo paga. Mirando esey anto sin kita afo cu tur hende tin derecho, nos no ta wak ‘spoedeisend belang’ di e trahadonan cu no tin ningun autoridad pa bati riba nan porta cu nan tin cu pag’e versus e importancia cual ta salba e compania.”
Segun e abogado Insel a mustra cu nan ta drechando nan situacion financiero. Tin un retraso pero ya caba ta solucionando esaki. “E retraso no ta 3 miyon asina manera NoticiaCla a sugeri. E otro partido tabata kere pero no ta e berdad y nos a mustra cu pa motibo di un acuerdo cu SIA (departamento impuesto) cu ta coriendo ya for di februari, e retraso a loop in for di 1.8 miyon te cu 570.000 florin.”
Sra. Schipper tambe ta bisa cu: “Nos a sugeri , extendi un man atrobe na e otro partido den corte, ban hunto traha riba un solucion. Mi ta duna bo como Insel inspraak pa ta parti di e solucion, no di e problema. Ban traha un comision. Pasobra e ora bo por wak hopi biaha e cosnan aki ta pasa ora trahadonan no tin bon inzicht, cu ta cla kico cierto pagonan no a wordo haci. E choice nan cu un operacion (di un compania) tin cu haci. Y si nos ta duna nan mas inzicht den esey, nos ta confia cu nan ta compronde y sostene e choicenan.”
Pakico no warda?
Segun abogado Skipper, algo cu a wordo discuti ta cu tin deliberacionnan cu Venezuela cu ta bayendo (pago retraso di divisa pega na e pais aki cu Insel ainda ta conta riba dje) bon. Pero e pregunta primordial akinan ta pakico mester keda asina duro riba e punto si un compania cu mas cu 100 hende ta bisa pa por fabor duna nan e chens y tempo anto warda un rato.
“Loke nos ta lamenta di Insel ta cu no a bin ningun sancion riba esey anto tin e impresion cu pa motibo cu varios di e lidernan di e otro grupo di empleado cu no ta den servicio mas, nan no ta worry. Esaki ta di lamenta pasobra e ta un compania importante pa Aruba y den su totalidad importante pa turistanan.”
Insel Air ta awor tin e monopolio riba e vuelonan di Aruba pa Corsou.
