Diahuebs atardi, pa mas o menos 4:30 a notifica central di polis di un caso na unda un homber mester a bira malo na un cas na Matadera.
Segun un comunicado di polis, a despacha patruya di polis como tambe ambulance pa e sitio di e sucedido.
Na yega di ambos en berdad ta topa cu un homber cu no tabata reacciona. Personal di ambulance a haci nan maximo esfuerso pero lamentablemente e homber a fayece.
A cuminsa cu un investigacion en conexion cu e caso, mirando cu e situacion no tabata mustra natural, posiblemente lo tabatin bolita den su curpa.
Dr. forensico Voskuil a presenta y ta constata morto di T.A. D’Aguiar di 44 aña naci na Corsou.
BFTO, como tambe Unidad Narcotica a presenta pa asina haci nan investigacion. Ariba ordo di Fiscal a laga tuma e curpa den beslag.
En conexion cu e investigacion andando a detene 2 persona ayera madruga. Ta trata di e homber J.M.Z. di 25 aña naci na Aruba. Durante un entrada hudicial na un cas na Papilon a detene e homber G.E.T. di 40 aña naci na Aruba.
E caso ta pleno investigacion y no ta descarta cu lo tin mas detencion.
Cuerpo Policial ta haci un apelacion na es cu a sa algo of a wak algo pa yama e tiplijn di polis cu ta 11141. Bo ta keda anonimo.
