Ayera durante dia, un candela grandi a consumi henter un cas na Papilon. Algun ora despues, a reporta cu un persona a fayece den e incidente.
Habitantenan di Papilon a scucha desordo, y a mira cu cantidad di huma ta sali di un cas. Nan a bati alarma, y mesora a despacha dos unidad di bombero, como tambe polis y ambulance pa e sitio.
E candela a crece bastante, di forma rapido consumiendo henter e cas. Habitante di e cas a yega, unda cu a drenta den panico pa e suceso. Polis no a permiti nan drenta e cas, pa nan propio siguridad. Recherche y departamento forensico a presenta pa haci investigacion, y ambulance a cuminsa atende cu hende cu tabatin mester.
Unabes cu bomberonan a logra paga e candela, a haya un curpa sin bida paden di e cas. Ta trata di un adulto hoben, kende ta asumi a fayece pa motibo di e huma. Un ruman di e fayecido a keda deteni, ya cu e tabata demasiado altera y strobando trabou di polis.
Pa 4or di atardi, Dr. Texier a constata morto di Rigoberto Junior Chemi Gilberto Kock, naci na Aruba dia 9 di october 1987.
Investigacion ainda ta andando pa aclaria e suceso.
