Ultimo desaroyo den e investigacion penal Ibis den corupcion entre otro di minister Paul Croes, ta cu e minister aki tambe ta sospecha di traficacion di hende. Ayera a detene tambe e homber J.F. cu tabata fungi como intermediado y ta sospecha di soborno di ambtenaar. F. ta tramitado di permiso.
Ministerio Publico a trece e informacion ayera unda pa prome biaha nan ta menciona cu e minister tambe ta sospecha di traficacion di hende. Bon Dia Aruba a puntra Ministerio Publico si esaki tin di haber cu e empleado ilegal cu a wordo haya na cas di minister Croes. Te ainda Ministerio Publico no por a elabora of duna mas informacion riba esaki. Den otro casonan di traficacion di hende husticia sa detene persona unda ta cera nan pendiente nan caso den corte. Pa motibo di esey Bon Dia Aruba kier sa con grave e acusacion aki ta y dicon no a opta pa cera e minister.
Cientos di ontheffing
Un otro detaye remarcabel cu Ministerio Publico a laga los ayera, ta cu e minister a otorga cientos di ontheffing di e prueba di mercado di labor (arbeidsmarkttoets). Bon Dia Aruba ta manera publica, pendiente riba un entrevista priminti cu minister Benny Sevinger pa cu e hotelnan na San Nicolas. Como cu e tambe ta encarga cu Asuntonan di Stranhero, nos kier pidi e mandatario tambe kico e ta haya di e gran cantidad di ontheffing cu su colega minister Croes a duna. Esaki pa motibo cu e consehonan aki finalmente ta yega e desk di minister Sevinger como cu e na final ta firma e permiso pa stranheronan por bin traha na Aruba. Manera menciona e sospechoso deteni ayera, ta un tramitado di permiso.
Tramitadornan di permiso ta personanan cu tin como profesion of cu tin un compania cu ta intermedia pa stranheronan ora di pidi permisonan di estadia. Nan ta cobra pa esaki. E sospechoso F. ta wordo sospecha di (entre otro) di paga minister Croes, y en cambio e minister a supuestamente percura pa clientenan di F. haya ontheffing di e arbeidsmarkttoets, cu ta algo cu ta cay bao departamento DPL. E arbeidsmarkttoets ta prescribi legalmente en principio, prome cu por duna un stranhero un permiso di estadia cu permiso di traha na Aruba, y tin como intencion cu trahadonan local ta wordo selecta pa funcionnan nobo prome cu stranheronan. Door di duna un ontheffing, e toets aki ta wordo salta. Manera nos a menciona e investigacion di husticia awor ta mustra cu den e añanan anterior minister Paul Croes a otorga cientos di ontheffing.
E team cu ta haci e investigacion Ibis (un combinacion di recherchenan di Landsrecherche, RST y Cuerpo Policial di Aruba) no a sinta keto desde e huiszoekingnan di 28 maart ultimo. Den e ultimo periodo hopi testigo y sospechoso a wordo scucha y a wordo haci investigacion di documentonan y computernan. E investigacion a hiba na e momento aki na detencion di F., cu lo wordo interoga tocante su envolvimento den e periodo venidero y ta den tur beperking. E investigacion lo continua y den e periodo nos dilanti lo sigui mas detencion. Polis na Aruba a haya sosten di recherche Hulandes cu a bin special pa yuda den e caso di Ibis.
