alto vista (2).jpg
Dialuna merdia un persona desconoci a wordo reporta ta purba horta placa for di turista na Alto Vista. E persona no a wordo haya anto tin posibilidad cu esaki no ta e prome biaha.
 
Sr. Robert Jeand’or ta forma parti di e comision cu ta cuida Alto Vista anto e ta splica Bon Dia Aruba cu esaki ta un noticia cu mester sali afo pa nos wak kico ta pasando na Aruba actualmente. “Dia pa dia nos ta mirando cosnan riba nos isla cu no mester pasa. Nos mester confronta nan di biaha y tuma rienda riba nan,” Sr. Jeand’or ta bisa. E conocido Atan Lee, un persona cu ta stima Kapel masha y cu ta haci su nobena tur aña eynan, a pone Sr. Jeand’or na altura cu den Kapel ta sosodiendo algo straño.
Turistanan ta bini na Kapel anto aporta tin biaha cu 1 dollar, localnan ta bin laga 1 florin anto aworaki un persona desconoci ta bisa e hendenan cu nan mester dun’e e placa pasobra e ta esun cu ta recauda e placa pa Kapel. “Unda nos ta bayendo? Di unda e cos aki ta sali cu un persona ta bin para akiden y bisa turista pa no tira e placa eyden, duna mi e pa mi hinc’e den mi saco anto nos ta recaud’e? Ami no conoce ningun hende akinan cu pastoor Santiago a asigna pa esey.” Sr. Jeand’or ta bisa cu tin solamente tres persona cu ta encarga pa maneha e Kapel anto no tin ningun otro hende, ni na misa di Noord cual Kapel ta cay bao di dje, cu a wordo asigna pa tuma placa di hende na Kapel.
 
Kisas no ta prome biaha
“Mi ta kere cu esaki ta di mas anto cu ta yega e tempo cu nos mester wak con nos ta bay haci di nos parti di un manera cu nos por yega wak si pa su mala suerte, e bin akiden cu nos por gar’e den e acto y trece esaki na polis di biaha pasobra ta di mas”, Sr. Jeand’or ta bisa Bon Dia Aruba cu te cu nan sa, esaki ta e prome biaha cu e cos aki ta sosode. Danki na e persona ey cu tabata den e Kapel cu a mira esey pasa su dilanti anto a comunica cu Sr. Atan Lee kende a trece e mensahe pa Sr. Jeand’or, awor nan ta na altura pero kisas esaki no ta e prome biaha cu e cos aki ta pasa sin cu nan sa. “Mi no ta kere esaki ta husto pa haci algo asina cu un luga cu e cas di Mama Maria cu tur hende ta stima asina tanto.”