Famia y amigonan di Yohana Salazar (40) di nacionalidad Venezolano ta preocupa, debi cu dia 22 di maart ultimo pa 6or di mainta Salazar a sali for di Puerto Escondido caminda pa Aruba cu boto y te na e momentonan aki nan no a scucha nada mas di dje.
Familiarnan di Salazar a tuma contacto cu diferente medio di comunicacion local na Aruba pa asina duna e informacion aki na unda nan ta sospecha cu Salazar por a bira victima di trata di persona ya cu te ayera, den oranan di atardi, nan no a scucha nada mas di dje.
Un familiar a conta na redactor di Bon Dia Aruba cu Salazar a sali mainta trempan cu boto for di Puerto Escondido, estado Falcon, caminda pa Aruba. Tambe el a indica cu “Kustwacht tabata persigui e boto y p’esey e capitan a dicidi di bent’e den lama pa asina e por scapa detencion. Segun e capitan mes, despues cu autoridadnan a check e boto, el a bay back na unda el a laga Yohana, aproximadamente 100 meter di e oriya. “Aunke e tabatin su vest bisti, nos no sa si el a hoga y su curpa ta flotando den awa, pero mi no por a hay’e niun caminda. Tampoco nos no sa si el a logra yega na tera of otro boto a gar’e y bay cune. Nos ta pensa cu si esey a pasa, e ta victima di secuestro di trata di hende, pasobra si el a yega caba y ta scondi e por a comunica cu nos via otro telefon, pero esey no a pasa y nos ta preocupa,” el a bisa.
E situacion di personanan cu ta drenta di manera ilegal cu boto na Aruba ta keda un topico vigente. Lastimamente, hopi persona ta pone nan bida den riesgo den awanan peligroso entre Venezuela cu Aruba y tambe Corsou, na unda e situacionnan manera esaki tambe ta tuma luga.
Pa e motibo aki, familiarnan y amigonan di Salazar ta pidi tanto na autoridadnan di Aruba y comunidad en general pa tuma contacto cu nan na e number di telefon +58.414.1765463 si algun persona haya mas informacion tocante e bienestar di Salazar.
Yohana Salazar tabatin un T-shirt blauw manga largo y un short preto bisti ora el a subi riba boto. Tambe e tin un tattoo riba su pia manera e potret ta ilustra.
