ORANJESTAD – Dr. Wilmer Salazar di departamento di Salubridad Publico (DVG) a trece mas trankilidad y menos panico relaciona cu e personanan local cu por a bishita e barco Freewinds durante e temporada cu a keda descubri cu un miembro di e tripulacion tabatin sarampi. E posibilidad cu un persona por a resulta contagia cu e virus y sigui plama esaki riba tera, ta masha minimal.
Si e persona den pasado a yega di haya sarampi of si el a haya e vacuna, esaki ta e dos forma cu e pashent ta keda immuun contra e virus di sarampi henter su bida. Na Aruba e virus aki a wordo eradica basta aña pasa y mayoria di nos poblacion ta vacuna.
Antes ora cu no tabata existi vacuna -y mayoria di nos poblacion ta vacuna- e virus aki ta produci gran cantidad di morto mundial. Pero despues cu a bin cu vacuna, e tasa di mortalidad a baha drasticamente, te ora cu den cierto pais manera Aruba, e virus no a manifesta su mes mas, of a keda eradica.
Un hecho cu a limita e posibilidad cu e virus por a contagia otro hendenan ta e prevencion cu e seccion medico di e barco a bin cune, di isola e persona contagia pa no tin contacto cu mas hende. E malesa aki tin un periodo di incubacion entre 14 pa 20 dia, caminda e virus ta multiplica su mes y ta crece, pero ainda e no ta contagioso. Despues e tin un efecto ‘prodromo’. Dr. Salazar a bisa cu esaki ta nifica cu e persona tin cierto sintomanan cu ta anticipa e enfermedad.
Un di e sintomanan ta keintura halto, calafriu, dolor di curpa y loke nan ta yama e tres C na Ingles, e lo ta nanishi ta core, ‘wowitis’ y tosamento. Aunke e tipo di sintoma aki no necesariamente mester ta sarampi, pero for di e punto di bista clinico y epidemiologico, eventualmente e por ta sarampi. E persona ta cuminsa bira hopi malo y ta aparece un rash caracteristico cu ta sali prome riba e linea unda cabey ta crece y despues e ta bay full completo riba e curpa.
Sarampi ta un virus transmiti via aire via drupnan ora cu un persona ta altamente contagioso. E ta afecta mas tanto nos sistema respiratorio, kiermen nanishi, garganta y pulmon. Si e pashent no tin e debido atencion e por bay mas leu y e por causa complicacion. Un di e complicacionnan ta infeccion di horea, e por bay cerebro y otro organonan di e curpa cu consecuencia di mortalidad tambe.
