Hefe di seccion comunicacion di Dimas, Lilian Lampe a aclara e situacion di proyecto ‘Dreamers’ pa cu personanan cu dicidi di bay sigui un estudio afo, pa despues bolbe bek Aruba. Segun sra. Lampe, tin un articulo den ley di admision di Aruba (LTUV) cu ta stipula un excepcion ora cu un permiso caduca. Ta trata aki di articulo 12 inciso d di e ley di admision.
Den un edicion di Bon Dia Aruba algun siman pasa, a haci un reportahe riba e permiso ‘Dreamers’. Tabata trata di un entrevista cu un persona cu a logra haya su permiso via e proyecto aki. A keda cu un pregunta cu no a wordo aclara door di departamento Dimas, esta si personanan cu e permiso aki por bay studia afo y bin bek Aruba cu e mesun permiso.
E articulo di ley aki ta stipula cu un permiso otorga pa un periodo indefini ta verval automaticamente si un persona establece su mes pafo di Aruba pa mas cu un aña. Cu excepcion en caso cu e persona bay sigui un estudio of pa tratamento den exterior. Den caso si bay sigui un estudio, e persona tin maximo un aña pa regresa Aruba despues di a termina su estudio pa e permiso permanece valido.
Pa e hobennan ‘Dreamers’, esaki kiermen cu nan lo por sigui cu nan estudio den exterior despues cu e opcionnan na Aruba caduca. Ora ta trata di e procedura pa obtene nacionalidad Hulandes ainda tin cosnan cu no a wordo aclara en cuanto e permiso aki.
Redaccion a tuma contacto cu vocero di IND (Servicio di Inmigracion y Naturalisacion) pero no a logra haya comentario ainda. Nos lo keda pendiente e proximo dianan pa reporta riba esaki.
