Siman pasa Bon Dia Aruba a purba haya claridad tocante e status di un caso cu pa casualidad a yega na nos desk. Un compania den exterior a emiti un comunicacdo di prensa tocante nan avancenan den adquiri un compania na Aruba, un VBA local, cu tin como meta produci fruta berdura y cannabis, segun e modelo innovativo di horticultura ‘vertical. Un metodo cu ta limita den forma dramatico e superficie necesario pa yega na un produccion grandi, aumentando e productividad pa metro cuadra sustancialmente, ademas di brinda mas oportunidad di limita costo di produccion, por ehemplo di uso di awa, loke ta faborece e rentabilidad di un proyecto asina.

En todo caso, esey tabata e obhetivo, pasobra, si e compania den exterior, cu ta un compania regustra na bolsa, cu no por gaña su accionistanan cualkier cos, ta papia berdad, a dicidi di traspasa accionnan y cu esey e tereno di, segun e compania stranhero atrobe, di 100 ‘acres’, mas di 40 hectare (400.000 metro cuadra).

Suficiente motibo, parce nos, pa cuminza haci pregunta, si en berdad un compania local a haya un tereno di e tamaño aki, riba su mes caba algo excepcional, sigur si ta trata di horticultura vertical, y tambe e observacion cu e tereno lo ta na parti nort di e isla. Inmediatamente nos a haya reaccion di e ministro encarga cu entre otro salud publico, cu no a pasa ley ainda pa cannabis y cu por lo tanto no a duna ningun permiso pa cannabis tampoco. Esey tabata un comentario irelevante, pasobra nos como prensa sa mes bon cu e ministro cu no a pasa ningun cambio di ley pa acomoda produccion di cannabis na Aruba; pesey nos no mester di e ministro. Loke nos kier a haya sa ta, si e compania local a haya un tereno di 40 hectare y awor eventualmente ta den proceso di benta/traspaso di esaki, mientras cu e compania, asina leu cu nos sa, no a produci ni fruta, ni berdura, mucho menos cannabis ilegalmente. Nos preocupacion no tabatin nada di haci cu e eventual proceso legal y permiso pa produci cannabis, ni cu produccion di whatever otro cos cu lo por a produci. Nos tabata djis kier sa si a emiti un tereno di e magnitud aki, y si esey tabata e caso, pakico y bao ki condicion.

Seguidamente a cuminza un wega di ‘caco scondi’ (un wega tradicional local, cu awendia ta mas bien conoci pa su version politico) pa no contesta e simple pregunta: e compania local a haya e tereno ey, si of no? Na final di henter un intercambio di comunicacion, den cual a manda nos tuma contacto cu e ministro encarga cu sector primario, cu asina leu cu nos sa, no ta emiti tereno; asina hopi nos tambe sa di gobernacion, nos no a bay riba e ‘zijspoor’ aki y nos a keda insisti cu nos ta desea un splicacion di e mandatario encarga actualmente cu Infrastructura, Desaroyo Teritorial y Medio Ambiente. Ultimo biaha cu nos a check, esey ta nos Promer Ministro, cu a hereda e cartera despues cu a pone un punto tras di e carera cortico di e ultimo mandatario di e cartera ey aña pasa. Naturalmente un contesta cla y contundente di e hefe di Direccion di Infrastructura y Planificacion tambe lo tabata suficiente, al fin y al cabo nos ta comprende cu e promer mandatario tin un agenda hopi ocupa. Pero a bin resulta cu e hefe tambe tin un agenda ‘druk’ y no a tende nada di su banda.

Kico ta e situacion actualmente y kico realmente nos ta desea di demostra aki? Djis pa ripiti: e asunto di cannabis no tin nada di haci cu e cos aki. Loke nos kier trece dilanti ta cu nos ta pasando den e drama nacional di tin dos ministro bao investigacion hudicial penal pa abuso y probecho personal, en corto corupcion, relaciona cu emision di tereno. Nos a mira un ministro renuncia poco tempo promer cu a cuminza e caso penal contra su persona, y nos ta supone cu su renuncia tabata relaciona cu e investigacion cu tabata na caminda. Aki ta trata anto di un mandatario cu por a siña ‘the tricks and the trade’ otro caminda, pero ta trata di eventual delito cometi como miembro di e actual gabinete (demisionario), durante cu e ministro presidente actual tabata ‘na warda’. Despues a bin henter e episodio cu su sucesora cu mester a bay cas, pasobra entre otro el a cuminza ‘ruim op spiritu’.

Den tur e guera di palabra cu tabatin e tempo ey, tin algun clave cu a keda claba den nos mente: “transparencia y integridad”. Y envez di ta cinico y despacha e bon intencionnan pa cumpli cu e palabranan grandi aki di biaha como mero ‘lip service’, nos a kere cu en todo caso e actual gobierno lo tabata interesa den evita cu e problemanan cu ta conduciendo na e hecho sin precedente di tin posiblemente varios mandatario anterior procesa pa husticia, lo por tuma lugar atrobe. Den legislacion no a cambia nada, esey nos sa, pero nos no ta mira nada cu ta indica cu tabatin sikiera un cambio den maneho. Esaki tambe ta un di e asuntonan cu ta warda Hulanda bin ruim op, of toch ‘nos mes por’?