Despues di a tende e partidonan concerni, e situacion cu a surgi entre organisadonan di evento Funstacle Masters y Fundacion Preserva Malmok despues cu e organisadonan a coba den saliña Malmok a bira un poco mas cla. E organisadonan aparentemente no tabata na altura cu nan no tabatin permiso pa coba den e saliña.

Diadomingo ultimo e evento Funstacle Masters su di 6 edicion a tuma luga na altura di Fisherman Huts na Malmok. Manera Bon Dia Aruba a publica ultimo dialuna, algun organisacion ambiental tabata preocupa ora nan a nota cu den preparacion pa e evento e organisadonan a coba den e saliña cu a wordo designa como area proteha. Un representante di Fundacion Preserva Malmok te hasta a bay asina leu di alerta e organisadonan cu si nan sigui cu e evento nan di e fundacion lo tuma accion legal contra e organisadonan y patrocinadonan.

Nos a papia cu Lincoln ‘Delo’ Gomez, kende ta representa e fundacion ayera atardi. Sr. Gomez a clarifica cu nan di e fundacion no ta esunnan cu a destina e area di saliña na Malmok como protehi. Sinembargo nan como fundacion si ta keda alerta ora tin desaroyonan cu por trece algun daño na e area aki. E fundacion a wordo lanta pa asina defende e interesnan di e habitantenan cercano na e area aki.

“E unico cos cu nos por a nota riba diasabra tabata cu diripiente a yega ekipo pa coba santo riba e saliña cu mashin pisa. Nos a puntra nos mes e ora ey ta kico ta pasando? Pakico tin un mashin cobando den e saliña? Despues cu esaki a wordo clarifica nos a compronde cu e evento no tabatin un permiso pa coba den e saliña. Nan tabatin solamente un permiso pa un caminata.”

Segun sr. Gomez despues cu esaki a bin cla na e fundacion nan a alerta e autoridadnan riba e echo aki debidamente. E representante di e fundacion a expresa cu por ta posibel cu e organisadonan no a realisa kico tabata e embergadura di e permiso cu nan a haya di parti di polis. Esaki mirando cu polis ta duna permiso ora ta trata di eventonan manera caminata of parada cu ta haci uzo di camindanan publico. Di otro banda tanto Departamento di Obra Publico (DOW) como Departamento di Infrastructura y Planificacion (DIP) ta encarga pa otorga permiso ora ta trata di haci uzo di tereno publico den cualkier manera.

E fundacion no lo tuma stap pa bay corte

Loke sr. Gomez kier enfatisa ta cu nan como fundacion no tin nada en contra e organisadonan specificamente. Ta solamente cu ora e preocupacionnan aki surgi nan ta haya nan mes cu e deber di stop algun daño posibel cu lo por bin pa e area. Pues den pasado nan como fundacion a yega di tuma accion, no ta algo nobo pa nan. Mucho menos pa ataca un evento specifico, segun sr. Gomez.

E representante di e fundacion a expresa cu ‘den un mundo perfecto, e naturalesa no lo wordo perturba di cualkier manera’. Pero awo cu e daño a wordo haci nan ta spera cu lo tin cooperacion civico riba e manera con ta reestablece e naturalesa di e area.

Tambe sr. Gomez ta enfatisa cu nan no ta kere cu e actonan aki a bin pa via di intencion malo di parti di organisadonan. “Si e organisadonan tabata na altura kico ta e limitacion di e permiso y cu nan no tin tur libertad pa coba buraco cu un permiso di caminata mi ta sigur lo nan no a haci loke nan a haci.”

Un carta cu tono basta fuerte a bay den direccion di e organisadonan ora cu sr. Gomez a manda un ultimatum pa e organisadonan stop cu e evento, cu condicion cu si esaki no wordo para lo por tin consecuencia legal pa nan. Sinembargo sr. Gomez a splica cu nan ta dispuesto di sinta cu e organisadonan of cualkier otro organisacion pa asina colectivamente bin na mas conscientisacion pa cuida naturalesa.

“Mi ta kere despues di e incidente aki e unico cos positivo ta cu di parti di e organisadonan, departamento di gobierno y publico en general lo tin mas alerta pa no bin daño na naturalesa. Tambe e ta positivo cu awendia tin mucho mas organisacion cu tin naturalesa na pecho y tin mas conscientisacion riba e nivel aki. Antes bo no tabatin un fundacion manera Preserva Malmok of Conserva Area Cristal.”

‘Ningun permiso a keda otorga pa DOW of DIP’

Bon Dia tambe a tuma contacto cu director di DOW Marlon Croes kende a confirma cu departamentonan concerni DOW y DIP nunca a duna permiso pa coba den e saliña. E director a concorda cu loke sr. Gomez a declara, esta cu e evento solamente tabatin permiso pa un wandelmars. “Nos a haya sa di dje y nos a manda par’e dibiaha”. E director a enfatisa cu e permiso aki ta solamente uzabel pa un evento riba caminda publico. E saliña no ta un caminda publico, ‘e ta un domeingrond’.

Ora ta trata di uzo di domeingrond ta DIP mester dicidi, segun sr. Croes. Si e organisadonan lo kier a pidi permiso pa haci uzo di e tereno nan lo mester a pidi pa un permiso precario. Sinembargo ‘nan no lo a haye tampoco’ pasobra e area aki a wordo distingui como area di naturalesa.

Segun sr. Croes, niun hende no por haya permiso pa un area distingui como area di naturalesa entrante e aña aki pasobra nan a wordo delinea como areanan di naturalesa protegi.

Despues di e evento e organisadonan a bay DOW, segun sr. Croes, pa asina palabra kico lo tuma luga despues di e evento. “Nos a bisa nan cu si nan cera e buraconan y laga tur cos manera cu e tabata nos ta lag’e te ey”. Na momento cu esaki no wordo cumpli cu ne y DOW tin cu bay restaura e area, e organisadonan lo wordo cobra pa e gastonan relaciona cu e trabou, sr. Croes ta informa.

Sr. Croes a declara cu DOW lo tuma mas precaucion pa asina percura cu e areanan aki no wordo treci den peliger den futuro. Esaki ta encera cu entre otro lo ‘cera e entradanan di saliña pa vehiculo ni ekipo haya chens di drenta den e area’.

Pues si e situacion cu a surgi tabata pa via di mal comunicacion di parti di departamentonan di gobierno no tabata e caso e biaha aki. Nos a tuma contacto cu vocero di polis Lito Lacle kende a specifica cu ‘mi mes a wak e permiso y e ta solamente pa un wandelmars’. Sr. Lacle a desmenti cu e organisadonan na cualkier momento a declara cu nan tabatin mester di coba den saliña.

“Ora un hende entrega un peticion pa permiso nos ta tende kico tur e evento ta encera pa asina coordina cu e diferente departamentonan cu lo mester duna permiso apart di loke polis ta duna. Pero e organisadonan aki nunca a delinea cu nan lo haci uzo di saliña”.

Organisadonan tabata tapando buraco bek ayera

Nos a tuma contacto cu un di e organisadonan, Curt Croeze, kende a splica nos cu ayera nan tabata tapando e buraconan bek. E organisado a declara cu posiblemente polis a haci un eror ora no a pidi e permiso precario cerca DOW. Segun sr. Croeze, den pasado e organisadonan a yega di bay cerca polis pa permiso di caminata pero a adverti nan cu nan mester pidi e permiso di DOW prome pa por coba den saliña. Normalmente esaki ta pasa y polis ta coordina cu DOW pero e biaha aki por ta algo a bay fout cu polis no a haci esaki, segun sr. Croeze.

“Pero tampoco mi ta kere e leynan a wordo pasa oficialmente pa proteha e areanan. Segun mi nan ta den proceso ainda. E ta un poco onduidelijk. Pero nos lo respeta esaki toch den futuro.”. Segun e organisadonan, nan ta keda den contacto cu polis y DOW pa asina percura pa e trabou cu keda awo, wordo haci y tur instancia wordo informa riba esaki.