Perla Gymnastics Aruba a logra varios medaya durante competencia internacional na Miami

Algun siman atras e club Perla Gymnastics Aruba a sali rumbo pa Miami pa un competencia internacional di rhythmic gymnastics na unda cu e ekipo di Aruba a logra diferente medaya di oro, plata y brons den e diferente categorianan. Adriana Sevilla, coach di rhythmic gymnastics ta conta Bon Dia Aruba un poco mas di e competencia aki y tambe ta elabora ariba e trabou di Perla Gymnastics Aruba.

Sevilla ta conta cu el a yega Aruba pa prome biaha na aña 2014, el a keda un tempo y despues el a bin back na 2015 y a keda na Aruba. El a cuminsa traha cu un ekipo di artistic gymnastics yudando cu e parti di coreografia y ballet. Na aña 2016 nan a habri e club di rhythmic gymnastics na Aruba, Perla Gymnastics Aruba, pasobra un club di rhythmic gymnastics no tabata existi ainda.

E prome competencia di e club tabata na Puerto Rico na aña 2017 y despues di eynan e team a cuminsa crece, a cuminsa haya mas muchanan cu tin mas condicionnan fisico y tecnico y asina nan a cuminsa participa den mas competencianan internacional na entre otro Merca y Costa Rica.

Aki na Aruba e club a organisa tambe e prome curso internacional di coachnan di gymnastics na Aruba unda cu nan a conta cu participacion alrededor di 20 coach. Na 2019 nan a organisa e prome competencia internacional di rhythmic gymnastics na Aruba cu a conta cu presencia di e presidente di e federacion internacional,di gymnastics, Morinari Watanabe, cu e unico deportista di rhythmic gymnastics na mundo cu e yega di gana dos olimpiada tras di otro, Evgeniya Kanaeva y tambe e campeon di Hapon di rhythmic gymnastics tabata presente.

Lamentablemente despues di esey e club tabata cera pa motibo di e pandemia y no por a participa den ningun competencia te e competencia di e aña aki, cu a tuma luga na Fort Lauderdale, Florida, for di 12 di mei te cu 15 di mei.

Sevilla a sigui conta cu den e competencia aki e club a logra gana hopi medaya. Un total di 12 atleta a bay competi y mayoria di e atletanan cu a bay a cay den e cuadro di e ocho miho atletanan di e competencia.

El a splica cu den e tipo di competencianan aki e exigencianan ta igual pa tur e atletanan y tur ta wordo husga mescos. E partinan mas importante, door cu e muchanan ta usa,di obhetonan den nan mannan manera bala of cinta, ta mantene concentracion, haci e coreografia completo, no faya den ningun tecnica y no laga e obheto cay ariba vloer.

“E base di rhythmic gymnastics ta ballet y e atletanan ta mas flexibel, compara cu e atletanan di artistic gymnastics, cu ta atletanan mas fuerte”, el a señala.

Perla Gymnastics Aruba ta e unico club na Aruba cu tin rhythmic gymnastics y esaki ta haci cu e ta diferente pa nan compara cu e paisnan mas grandi cu tur siman por tin competencia, cu tin campeonatonan nacional y durante e pandemia nan por a sigui participa.

“Nos aki na Aruba pa nos por participa nos mester biaha den exterior. Mi ta kere cu despues di tres aña di pandemia y ningun competencia, e resultado cu nos logra tabata hopi positivo. E aña aki nos ta bay organisa un biaha mas nos competencia internacional tambe”, el a agrega. .

Pa loke ta trata apoyo di organisacionnan of sponsornan, Sevilla a remarca cu e club no sa ricibi te ainda apoyo for di ningun instancia, pero nan ta habri pa e posibilidad di esaki mirando e costonan halto cu ta bin cu e deporte aki. E apoyo cu e atletanan ta ricibi ta bini 100% for di e mayor di e muchanan mes. Tur gasto, for di inscripcionnan, costo di biahe, vestuario, acesorionan y demas materialnan necesario pa e muchanan por participa den un competencia internacional di rhythmic gymnastics ta cay riba e mayor di e muchanan.

Sevilla a subraya cu e deporte aki specificamente ta uno costoso, ya cu un vestuario pa un competencia ta costa entre $200 y $300, cu ta un prijs super economico door cu normalmente un costume ta costa mas cu $400. E acesorionan cu e muchanan mester usa durante e competencia, por ehempel e bala, ta uno special cu tambe tin un costo di minimo $100.

“E ta un deporte hopi costoso y mi ta gradici e mayornan tur dia cu nan ta sigui apoya nan yiunan pasobra esaki ta yuda cu e muchanan ta haci algo positivo, nan no ta riba caya of cu nan ta pensa riba otro cos”, el a indica.

Perla Gymnastics Aruba tin diferente categoria di gymnastics cuminsando for di 2 aña di edad bay ariba. Nan tin tambe team di gymnastics artistico pa mucha homber, Triton Gymnastics Aruba.