(AP) – Te ainda e no ta cla, pero datonan te cu awo ta sugeri cu personanan ta contagioso hopi mas trempan cu Omicron, compara cu variantenan anterior, posiblemente un dia despues di infeccion.
Merca su Centers for Disease Control and Prevention a bisa cu personanan cu coronavirus ta den e etapa unda cu ta mas facil pa infecta otro personanan den e prome dianan prome y despues cu e sintomanan desaroya. Pero e bentana aki di tempo por pasa mas lihe cu Omicron, segun algun expertonan.
Esaki ta pa motibo cu aparentemente Omicron ta causa sintomanan hopi mas lihe cu e variantenan anterior, mas o menos 3 dia despues di infeccion, cual ta un averahe segun e estudionan preliminar. Basa riba datonan anterior, esaki ta nifica cu personanan cu Omicron por cuminsa bira contagioso te hasta un dia despues di infeccion.
Cu variantenan anterior, hendenan tabata contagioso 2 pa 4 dia despues di infeccion. Y personanan ta permanece contagioso algun dia despues cu e sintomanan pasa.
Investigadonan ta bisa cu ta hopi trempan pa sa si e periodo aki mas cortico pa Omicron ta traduci na un periodo mas trempan di contagio. Pero esaki ta yuda splica e variante su velocidad den plama.
Dr. Amy Karger di University of Minnesota Medical School ta recomenda pa hendenan test nan mes por lo menos 3 dia y 5 dia despues di ser exponi na e virus si ta posibel.
“Hopi persona ta saliendo positivo te hasta 3 dia despues,” Karger a bisa, refiriendo na Omicron. “Tin basicamente un oportunidad aki di detecta e personanan hopi mas lihe di loke nos por a haci cu e otro variantenan.”
Si bo solamente tin un solo test cu bo por haci, e ta acceptabel pa warda te e di 5 dia segun Karger su recomendacion.
Testnan desaroya den laboratorio ta hopi mas sensitivo cu testnan casero, nificando cu nan lo por detecta e virus despues di 3 dia di exposicion na e virus, y den cierto ocasion mas trempan.
Personanan cu no ta desaroya sintoma generalmente su nivelnan viral ta hopi mas abao, nificando cu e ta menos comun pa nan tin e periodo di contagio aki, y den algun ocasion no tin esaki en general.
Sinembargo, e personanan cu test psitivo pero no tin sintoma, mester sigui isola pa por lo menos 5 dia, bao di e ultimo guianan di Centers for Disease Control and Prevention. E agencia a ricibi varios critica pa no rekeri un resultado negativo prome cu sali for di isolacion, pero hasta despues di a ahusta algun di e guianan, e oficialnan a bisa cu e paso aki mester permanece opcional.
Hendenan cu sintoma mester keda den isolacion te ora cu nan ta liber di keintura pa por lo menos 24 ora.
