Diabierna awor ta tuma luga den corte tratamento di e caso den cual cuater periodista local ta sospechoso di, entre otro, soborno di agente policial y participa na un organisacion cu intencion pa comete crimen y/of soborno di un ambtenaar (polis). E caso aki ta relaciona na e caso di agente policial R. Vos, ken a keda acusa y sentencia pa su participacion.

E sospechosonan di inicial R.P.L, B.L.R.K, N.E.A.G y N.M.Q.C.d.A. ta acusa di, for di periodo di prome di januari 2021 te cu 22 di maart 2023, conhuntamente intencionalmente a viola secretonan cual nan tabata sa cu e ambtenaar, relaciona cu su funcion, tabata obliga pa tene. Nan ta acusa di, den e periodo ya menciona, a participa den un organisacion cu tabata consisti di un y/of mas otro persona cu tabatin como meta pa comete crimen, esta, corupcion di un ambtenaar y/of tuma y/of duna soborno y/of maluso di funcion y/of violacion di secreto di trabao.

E caso aki a bin dilanti despues di e caso penal New York di ex polis R.Vos a cuminsa, caminda na maart 2023, a bin haya varios laptop y portofon na cas di Vos. E portofonnan aki tabata conecta na e laptopnan.

For di investigacion di BIV (Bureau Integriteit en Veiligheid di Cuerpo Policial di Aruba) y investigacion tecnico a sali cu periodistanan a duna Vos ekipo y software pa usa pa difundi comunicacion policial na un manera integral. Pa e motibo ey, Vos a ser acusa di a transmiti informacion policial na varios periodista di medionan do comunicacion conoci na Aruba durante varios aña, por lo menos mas cu dos aña. For di e dossier di e caso ta sali cu el a ricibi sumanan di placa y regalonan a cambio.

Inicialmente e caso tabatin fecha pa tratamento den luna di juni, pero riba peticion di abogado Canwood, a pospone y a haya e fecha nobo cual lo bira diabierna 15 y dialuna 18 di november venidero.

Tabata den maart di aña pasa cu ex agente policial R. Vos a keda deteni y tabata sospechoso di varios delito: apropiacion ilicito intencional di portofonnan y/of charger, di viola secretonan cu e tabata obliga pa tene como agente policial, di tuma regalo of promesa y di participacion na un organisacion criminal.

Dia 7 di juli 2023, Vos di 51 aña di edad a presenta dilanti hues pa trata su caso pro forma. Na e momento ey, fiscal a splica cu e investigacion no tabata cla, sino cu por dura por lo menos tres luna mas, y cu Vos mester keda deteni pa evita cu e por stroba e investigacion. Na e momento ey a logra habri un di e laptopnan cu a confisca den entrada hudicial na su cas, cual tabatin informacion cu a compromete Vos den e caso aki.

Abogado di Vos a pidi hues pa suspende e detencion preventivo, mirando e situacion personal di famia di Vos – e tabata e unico cu tabata provee pa su famia y awo su salario a stop y no tin entrada. Sinembargo, hues a rechasa e solicitud despues cu fiscal a splica cu door cu mester scucha mas hende, si Vos sali, e hendenan en cuestion no ta bay papia mas.

Dia 21 di september e caso pro forma a tuma luga, fiscal di Ministerio Publico a pidi hues pa interoga cinco periodista di diferente medio di comunicacion di Aruba. Den e tres laptop confisca a haya posibel mensahenan entre e acusado y e reporteronan sospechoso, cu ta demostra cual informacion confidencial a sali riba rednan social.

Na fin di e sesion aki di september, hues a bay di acuerdo cu e fiscal y a dicidi pa manda e caso na hues pa cuestiona e cinco sospechoso y pa e caso continua riba 8 di december 2023.

December ultimo hues a condena ex agente policial R. Vos na 16 luna di prison, di cual ocho luna ta condicional. Ademas hues a prohibie pa ocupa cargonan publico pa un periodo di 3 aña. E acusacion di organisacion criminal den opinion di hues no a ser proba. Vos a ser condena pa malversacion, violacion di ambtsgeheim, abuso di su funcion y corupcion door di miembronan di prensa.

Ministerio Publico no tabata di acuerdo cu e sentencia y a apela esaki. Fiscal su exigencia di castigo pa Vos tabata un castigo di prison di 36 luna, di cual 8 luna ta condicional. Ademas Ministerio Publico a exigi un prohibicion pa ocupa cargonan publico pa un periodo di 5 aña y 3 aña di tempo di prueba.

Siguiendo pa dilanti, fiscal a indica cu Ministerio Publico a cuminsa cu un investigacion cu ta enfoca riba e motibo cu algun miembro di prensa tabata yega tur caminda unda algun suceso a tuma luga prome cu miembronan di Cuerpo Policial mes.

Segun Ministerio Publico tabata sospecha cu cierto periodista tabata por a scucha radio di polis di algun forma. A recorda cu esaki no ta prome caso di e naturalesa aki, pues ya caba den pasado varios agente policial a ser castiga y a hasta perde nan trabou pa motibo di acepta soborno for di miembro di prensa na Aruba a cambio di informacion policial pa duna noticia.

Manera ya caba menciona e periodistanan R.P.L, B.L.R.K, N.E.A.G y N.M.Q.C.d.A. lo mester presenta dilanti hues diabierna 15 di november pa cuminsa cu e tratamento di nan caso. E dia aki por spera cu Fiscal lo presenta su exigencianan y abogado defensor lo presenta su defensa. Si acaso e tratamento di e caso no culmina diabierna, esaki lo continua dialuna 18 di november.