Periodista Sharina Henriquez: Minister Wever no sa suficiente kico ta e rol di prensa den democracia

Uzo di fondo publico pa ataca oponente politico ta propaganda estatal y herment dictatorial

Minister di Comunicacion mr. Geoffrey Wever no por bin cu un mediaraad of un mediawet sin cu prome e Minister analisa e forma con su propio Gobierno mes ta utilisa media. Pasobra na momento cu un Gobierno ta haci uso di fondonan publico pa hiba un propaganda politico dirigi na contrincantenan, dificilmente por hustifica un ley of organo pa controla kico media por haci of no. Esey ta pensamento di periodista Sharina Henriquez di Caribisch Netwerk. 

Henriquez, ex funccionario di Rijksvoorlichtingsdienst na Hulanda, hunto cu periodista Ariën Rasmijn a tuma e iniciativa pa reuni algun luna pasa cu Formado Evelyn Wever Croes riba e plannan di un mediaraad. E dos periodistanan a tuma e paso pa tende di e grupo diverso di media y periodistanan pa asina hiba un combersacion riba e balor democratico fundamental di un prensa liber. “Nos tur sa cu tin hopi media ta sirbi interes politico y comercial, pero e ta bay pa e principio cu prensa mester funcciona di forma liber,” Henriquez a bisa Bon Dia Aruba.

Reunion cu Evelyn Wever Croes

Sharina Henriquez a reuni dos biaha cu mr. Evelyn Wever Croes, un biaha den su calidad di Formado y despues como Prome Minister. Durante e prome encuentro, Wever Croes  a haya e informacion cu en todo caso, apesar di diferencianan den estilo, periodistanan ta contra di un asina yama ley di media.

E di dos combersacion cu Evelyn Wever Croes tabata den su categoria di Prome Minister, y e momento ey, Henriquez tabata compaña pa Tito Lacle. Rasmijn entretanto ya tabata biba den exterior. “Mi a puntra pa e notulanan di e prome reunion, y Prome Minister a bisa cu e lo percura pa esakinan,” Henriquez a bisa, algo cu no a sosode ainda. Yamativo di e di dos reunion tabata cu e tabata unicamente cu Prome Minister. Durante e reunion ey a trece dilanti algun aspecto y keho specifico di cierto medio, pero no a discuti nada di un mediaraad ni un mediawet (ley di media). “Ningun hende a papia di e tema, pues ora cu Minister Wever a papia e mediaraad y e mediawet a cay manera un sorpresa.”

Como tal, pa Henriquez e ta dificil pa compronde con e Minister por papia di e tema di forma publico sin cu un dia a reuni cu personanan den media. “Berdad durante e ultimo combersacion cu Prome Minister, Mr. Evelyn Wever Croes a keha di tur e atakenan cu e ta sinti cu e cu su famia ta ricibi y locual nos a bis’e cu e (como hurista) sa e caminda cu por cana, esta pa bay Huez, sigur si e comentarionan ta bay mucho leu. Pero mr. Geoffrey Wever no tabata sinta den e reunion. Tampoco el a tuma contacto via Prome Minister.”

Locual ta hopi cla pa Henriquez si ta, cu for di skina di Gobierno nan no ta contento cu tur e atakenan cu ta ricibi. “E tabata hopi cla cu Prome Minister tabata busca forma pa para atakenan cu e ta considera discriminatorio na dje como hende muhe y na su famia.”

Uso di fondo publico pa atake politico

E ta obvio cu no tin hopi amor entre Gobierno actual y particularmente 24ora. Y Minister Geoffrey Wever a argumenta e necesidad di un ley mencionando entre otro 24ora.

Di su banda Henriquez ta sinti cu e argumento contra “media” cu Gobierno tin, ta sosode pa medio di uso di fondonan publico. “Ta usa placa di belasting, pa ataca contrinctantenan politico cu riba su mes ta ilustra un forma robes di anda cu media. Un Gobierno no por usa fondonan publico cu a haya encargo pa maneha,  cu ta placa di belasting, pa reacciona riba oponentenan politico. Unabez den Gobierno, ya no por actua di forma partidista,” Henriquez a comenta. “Si bo partido kier reacciona ta un cos. Pero laga personal cu ta ricibi fondo publico pa reacciona contra oponentenan, manera riba un Miguel Mansur, Ryçond do Nascimento, un Marisol Lopez Tromp of recientemente Mervin Wyatt Ras no ta algo cu por hustifica cu ta e pagado di belasting ta carga cu e cuenta. E uso inapropia di fondo publico pa ataca oponente ta nada otro cu propaganda politico. E ta inhusto. E atakenan politico mester sali di e partido of di bo asistente cu bo mes ta paga,” Henriquez a enfatisa. “Mi a papia di e tema aki tambe cu Prome Minister, esta cu si kier ta husto, e mester refleha den e maneho di propaganda paga den media.”

Pues, no por djis scohe e media cu e partido na mando ta gusta, pasobra ta traha cu fondonan publico.

En todo caso, na e momentonan medionan di comunicacion ta inunda cu relatonan di prensa di Gobierno y di Ministernan cu ta netamente politico cu atrobe ta ilustra un desbalance ya cu hopi ta informacion hopi politico y mas bien ta un forma directo di influencia politico. “E informacion ta di un banda so, pasobra nan tin e placa. Media y periodistanan no tin e acceso na fondo pa yega na informacion cu mester.” Henriquez a mustra cu si compara cu Hulanda, un Gobierno Hulandes no ta reacciona riba atakenan politico. Un Secretario di Estado Raymond Knops ta duna contesta of splicacion na Tweede Kamer pero no sin mas ta skirbi un relato dunando reaccion riba un persona di Gobierno di Aruba, por ehempel.

Michael Williams, 24ora  y Geoffrey Wever

No ta un secreto cu sr. Michael Williams pa hopi aña caba ta usa idioma fuerte y hasta menasante contra hende y particularmente politiconan cu e tin discordia cu n’e. Y e declaracion di Minister Wever pa bin cu un mediaraad, mediawet y codigo di conducta tabata basa riba e ultimo atake verbal, fuerte cu Williams a trece dilanti.

Sinembargo, te asina leu cu sa, Gobierno no a entrega keho na Ministerio Publico pero mas bien kier bin cu herment pa controla media y esaki ta inacceptabel pa hopi periodista y tambe Sharina Henriquez.

“E paso di Minister Wever ta dirigi contra 24ora. E ta simplemente asina.  Y locual Minister Wever kier introduci regulacion di forma anticipativo y e peliger di esaki ta cu ta introduci limitacion y censura. Nos tin un codigo di conducta y locual mi por saca afo ta cu e Minister no ta mucho na altura kico ta e papel di periodismo y kico tin caba.”  Pa Sharina Henriquez, su conclusion ta cu Minister Geoffrey Wever no sa suficiente kico ta e funccion di periodismo den un democracia.

“Y na di dos luga, den un democracia mester tin balans. Un Gobierno mester haci su trabou bon, un Parlamento, si ta bon, mester haci su trabou debido y prensa mester controla ambos. Nos tur ta conecta na otro y ta controla otro. Pero si tin un Gobierno cu tin acceso na tur medio financiero pa ataca esnan cu nan ta considera oponente politico, nos como periodista ta sinti esaki directamente.”

Conseho pa Minister di Comunicacion

Y kizas no ta e Minister of e partido politico mes ta menasa e periodista, pero si su siguidor. E menasanan contra periodistanan riba media social ta constante y hopi y cierto momento ta rekeri atencion di Ministerio Publico. “Publico y fanaticonan di partidonan politico mester realisa cu si ta ataca un periodista riba medio social, no ta algo sin mas. Un periodista tin su papel den democracia. Y esey lo mi kier conseha Minister Wever, esta si kier haci algo cu media, tene tambe na consideracion cu periodistanan ta constantemente bou presion politico. Pues no ta cuestion cu e mester bin solamente cu regulacion pa controla nos, pero tambe motiva y sostene nos trabou. Por ehempel, Hulanda ta promove periodismo cu fondonan di motivacion (Stimuleringsfondsen). Pakico nos no ta tende nunca algo di esey.”

E ta berdad cu den periodismo na Aruba ta sosode cos cu no por, Henriquez ta admiti y ta bisa cu esey ta bin door di e realidad cu tin hopi interes politico y comercial tras di cierto media, y tambe door di falta di conocemento. “Bin cu algo positivo si bo kier pa e profesion desaroya su mes mas. E ta den interes di Gobierno, Prome Minister Evelyn Wever pa duna e bon ehempel.”

Propaganda estatal

Henriquez ta reconoce cu algun media no ta imparcial, pero comunidad mester si di un Gobierno cu ta imparcial. Y awor e ta ilustra net lo contrario. E ta hopi leu pa ricibi informacion di Gobierno tur dia, no riba proyectonan of informacion riba maneho, pero mas bien articulonan contra oponentenan,  usando nomber y titulo. Pa esey no por usa fondonan publico.”

Ehempel clave ta con Hulanda, Islanan BES, Corsou y St. Maarten ta usa su media social. Tur ta bou titulo ‘Gobierno di’, pero esun di Gobierno di Aruba, e ta claramente bou ‘Gabinete Wever Croes,’ cu tin su tinte politico. “Ora ta den Gobierno, bo no ta mara mas na bo partido. Si bo ta pa henter comunidad, con ta bay inverti medio publico den informacion cu ta mas tanto reaccion politico. Eseynan ta propaganda di estado, cu ta inicio di dictadura.”