Periodista investigativo Peter R. de Vries a fayece awe, segun noticia divulga pa su yiu homber. De Vries a yega na 64 aña di edad y tabata den estado critico na hospital despues cu diamars siman pasa 6 di juli el a ser ataca cu arma di candela ricibiendo varios impacto di bala.
De Vries pa varios decada tabata e icono di periodismo investigativo na Hulanda, specialmente relaciona cu criminalidad. Relaciona cu e tiroteo den Lange Leidsedwarsstraat na Amsterdam, despues cu De Vries a sali di studio di RTL Boulevard unda e tabata den un transmision, a aresta tres persona, di cual dos a keda deteni. Un di nan cu ta sospechoso di a tira riba De Vries ta un hoben di descendencia Arubiano y e otro ta supuestamente chauffeur di e auto cu cual nan a huy despues di e sucedido.
Den medionan Hulandes tabatin hopi speculacion tocante e relacion di e asesinato di De Vries cu e caso Marengo, contra e criminal Ridouan Taghi, cu ta bao sospecho di dirigi un organisacion criminal den narcotrafico, y cu lo a ordena asesinato di varios persona. Durante tratamento di e caso a tuma lugar mas liquidacion, di e ruman di e testigo clave contra Taghi, Nabil B. y su abogado Derk Wiersum. Peter R. De Vries desde aña pasa tabata fungi como asesor y portavoz di Nabil B.
