Despues cu Bon Dia Aruba a publica un articulo na luna di juni 2022 cu e titulo “Segun documento cu a leak, hurista di DIMAS a gaña hues comisario di Corte di Prome Instancia,” director di DIMAS e momento ey, Kathy Paskel y hefe di asilo, Jacqueline Harewood a core entrega un keho penal dirigi directamente riba e periodista.

Siguientemente, door di un investigacion periodistico cu Morillo di corant Bon Dia Aruba ta bin haciendo riba departamento di Guarda Nos Costa (GNC)—di cual tambe Bon Dia Aruba a publica diferente articulo— el a haci preguntanan mediante e-mail y telefon pa loke ta trata e investigacion aki.

Un otro funcionario, pero e biaha aki di GNC di nomber Ghislane Solognier, tambe a entrega un keho contra e periodista pa simplemente haci varios pregunta na su persona, loke e principio fundamental di periodismo ta yama hoor en wedehoor.

Pa tur esaki, e periodista ta bay entrega kehonan di vals aangifte, meineed, keho di valsheid in geschrifte vanwege “onjuistheden” den un inbewaringstelling.

Caso DIMAS
Bracho Bracho, un persona di nacionalidad Venezolano ken su orden di deportacion tabata den cuadro legal, a keda den libertad na aña 2020. Hefe di asilo Harewood, ken a representa DIMAS na e momento ey, a bisa hues comisario Soffer di Corte di Prome Instancia cu no tabatin decision ainda, debi cu no por a entrevista Bracho Bracho pa motibo cu e tabata den cuarentena pa Covid-19. Pero documentonan oficial di DIMAS ta mustra un escenario totalmente diferente. Investigacion oficial ta mustra cu Bracho Bracho su entrevista a tuma luga specificamente dia 20, 22 y 23 di April 2020 door di  e ex-funcionario di DIMAS, Carl Giel. Di esaki, hefe di asilo Harewood y ex-director Kathy Paskel a haya un concepto di decision di Bracho Bracho su asilo via nan e-mail dia 4 di Mei 2020.

Hues comisario M. Soffers ta considera lo siguiente:

Segun e sentencia cu ta numera LTU nr. AUA202001277, 4.1 ta bisa:

“E persona concerni a entrega dia 6 di april di 2020 un peticion pa asilo. E ordo di deportacion emiti dia 1 april di 2020 no ta caduca door di peticion di asilo, pero e ta suspendi. Guarda Nos Costa (GNC) no por deporta e persona concerni a base di e prohibicion di refoulement mientras tanto cu no a dicidi riba su peticion di asilo. Awor cu e persona concerni  ta den detencion en espera di e decision di su peticion di asilo, DIMAS mester trata e peticion di asilo mas lihe cu ta posibel.”

Punto 4.2 di e sentencia di 10 di juni di 2020 ta bisa:

“Durante e tratamento di e caso dia 3 di juni di 2020, a sali na cla cu ainda no a tuma decision riba e peticion di asilo di e persona concerni for di fecha 6 di april di 2020. Harewood (DIMAS) a duna di conoce durante e tratamento di e caso cu e procedura pa tuma decision a tarda pasobra e persona concerni tabata den cuarentena pa dos siman largo, esaki relaciona cu e reglanan na vigor pa preveni e contagia di corona, cu consecuencia cu no por a scucha e persona aki. E hues-comisario ta compronde locual Harewood (DIMAS) ta bisa relaciona cu e hecho cu e procedura pa tuma decision a tarda door di e coronacrisis. Sin embargo, despues di 8 siman, (DIMAS) ainda no a tuma un decision riba e peticion di asilo. Basa riba e circunstancia aki, hues comisario ta wak cu e interes di e persona concerni pa lanta e detencion ta pisa mas cu e interes di Harewood (DIMAS) pa laga e persona concerni warda e decision riba e peticion di asilo den detencion.”

Investigacion Oficial riba e Feitenverslag (ambtshalve) Harewood

A base di e articulo cu Bon Dia Aruba a publica, a cuminsa un investigacion door di seguridad nacional (VDA) y tambe internamente den e departamento. Segun e documentonan oficial cu Bon Dia Aruba a haya for di un fuente y ta dispone di dje, Kathy Paskel a laga haci un “feitenverslag” unda cu tabatin un contestacion ambtshalve (oficial) di Harewood, unda por lesa cu Bracho Bracho su entrevista en berdad a tuma luga na GNC fin di april 2020 y tambe 4 di mei 2020 tabatin un concepto di beslissing cu e la ricibi den su e-mail.

Segun e documento oficial na Hulandes ta bisa, “De mededeling van Harewood tijdens de zitting 3 juni 2020, zijnde dat Bracho Bracho niet eerder had kunnen worden gehoor, is aldus in strijd met de waarheid.”

Funcionario di Guarda Nos Costa Ghislaine Solognier

E di tres keho contra Morillo, periodista di Bon Dia Aruba, ta di e funcionario publico di Guarda nos Costa, Ghislane Solognier, ken pa motibo cu Morillo haci preguntanan “incomodo” na su persona, a dicidi di entrega e keho pa “daña su bon nomber”.

E preguntanan tabata dirigi tocante un bevel di inbewaringstelling cu Solognier a traha dia 31 di augustus 2022, firma pa ex-director di GNC, Richard Kramers den nomber di minister di Husticia, Rocco Tjon, a kita un persona su libertad y pone den detencion. Den esaki a bisa hues comisario Yarzagaray cu tabatin “control”, pero e berdad ta cu no tabatin niun control, pa motibo cu ta prohibi pa haci control kibrando ley di trafico coriendo den verboden.

Akinan e toezichter Solognier cu otro funcionario di GNC Elvis Perez a pasa den verboden pa “opsoren” e persona en cuestion unda cu su propio ex-hefe y ex-director Kramers a declara na Landsrecherche esey. E persona aki a caba di sali for di Corte di Prome Instancia pa tratamento di su caso di asilo y dos siman despues Land Aruba a prohibi pa deport’e.

Solognier a skirbi den su inbewaringstelling cu durante un “control” den Caya Grandi a detene e persona, pero no a bisa hues comisario Yarzagaray cu nan a opspoor un aziel zoeker saliendo for di Corte y a usa e auto di dienst GNC D-227 den e detencion ey, cu no ta un voorrangsvoertuig y asina a kibra ley di trafico pa haci un detencion den verboden.

Ningun instancia di Gobierno no mag di core den verboden. Bon dia Aruba ta dispone di video con e toezichter Solognier y Elvis Perez a pasa den verboden y a haci e detencion ey den Caya Grandi.

Tambe Morillo a puntra Solognier si e ta conoce Emilia Torres, un persona cu a keda deteni den un accion di GNC cu a tuma luga na un restaurant na Madiki unda e tambe tabata presente na e accion aki. Den esaki Bon Dia Aruba no ta bay den detaye, pero si lo meld esaki na instancianan concerni.